काठमाडौं । माेरङकाे विराटनगरमा रहेको द सेन्चुरियन होटेल र नेक्सजेन म्यानेजमेन्ट बीच पुँजी वृद्धि, लगानीकर्ता जुटाउने र होटल सञ्चालन सम्बन्धमा सम्झौता भएको छ । सो सम्झौता बुधबार सेन्चुरी ग्रुप अफ कम्पनीको ज्ञानेश्वरस्थित कार्यालयमा भएको हो । सम्झौतापत्रमा सेन्चुरियन होटेलको तर्फबाट अध्यक्ष मोतिलाल दुगड र नेक्सजेन म्यानेजमेन्टको तर्फबाट अध्यक्ष रमेश कुमार भट्टराईले हस्ताक्षर गरेका हुन ।

विराटनगर–धरान रोडस्थित सहरको केन्द्रविन्दुमा द सेन्चुरियन होटेलको १० तल्ले भवन निर्माण सम्पन्न भइसकेको छ । भवनमा व्यावसायिक प्रयोजनका पसलहरू, सभा सम्मेलन, विवाह व्रतबन्धका लागि बैंक्वेट हल समेत उपलब्ध हुनेछ । सोही भवनको चार तलादेखि माथि पाँच तारे स्तरको १४६ कोठाको र्‍याडिसन विराटनगर होटेल सञ्चालन हुनेछ ।

होटेल सञ्चालनको लागि अन्तर्राष्ट्रिय ब्राण्ड र्‍याडिसन होटेल ग्रुपसँग जुलाइ २०२२ मा सम्झौता भइसकेको छ । नेपालका उद्योगपति तथा पूर्व मन्त्री मोतिलाल दुगडको नेतृत्वमा सेन्चुरी ग्रुप अफ कम्पनीअन्तर्गत यो पाँच तारे होटेल सञ्चालन हुनेछ ।

होटेललाई पाँच तारे तथा अन्तर्राष्ट्रिय स्तरको बनाउन र अन्य थप आवश्यक निर्माण र साजसज्जाको लागि थप पुँजी आवश्यक पर्छ । सोही उद्देश्यको लागि कम्पनीको पुँजी वृद्धि गर्न, थप संस्थापक लगानीकर्ता ल्याउन तथा अन्य आवश्यक व्यवस्था गर्न नेक्सजेन म्यानेजमेन्टसँग सम्झौता गरिएको हो । साथै सोही सिलसिलामा कम्पनीको पुँजी वृद्धि गर्न र सर्वसाधारणलाई सेयर निष्कासनको प्रावधानसहित लिमिटेड कम्पनीमा परिणत गर्ने प्रक्रिया पनि अगाडि बढाइसकेको छ ।

नेक्सजेन म्यानेजमेन्ट सोलुसन्स प्रा.लि. पूर्व बैंकरहरू समेतको लगानीमा स्थापित सम्पत्ति व्यवस्थापन र व्यावसायिक परामर्शदाता कम्पनी हो । यसले ठुला, मझौलास्तरका उद्योग व्यवसायको स्थापना, सञ्चालन व्यवस्थापनमा परामर्श सेवा दिँदै आएको छ । यसले भर्खरै सम्पन्न अन्तर्राष्ट्रिय लगानी सम्मेलनमा नेपालमा विभिन्न उद्योग व्यवसायमा ६ अर्ब लगानी भित्र्याउने गरी कोरियन कम्पनी एम.ए.वि.सि. इन्भेष्टमेन्ट ग्रुपसँग सम्झौता गरिसकेको छ ।