काठमाडौं । नेकपा (एमाले)का प्रमुख सचेतक महेश बर्तौलाले सबै मुद्दा सर्वोच्च अदालतमा आउने अवस्था आएको बताएका छन् ।

बुधबार बजेटको मन्त्रालयगत छलफलमा उनले संघीयतामा गएपछि पनि सबै मुद्दा सर्वोच्चमा थुप्रिएको बताए । “सबै मुद्दा सर्वोच्चमा ल्याउने हो त ? न्यायिक समितिमा उठेका कयौँ विषय पनि सर्वोच्चमा आउन थाले । त्यसकारण हामी राजनीतिक पार्टीमा छलफल चलाउन सकिन्छ । संविधानमा व्यवस्थित गर्ने हो भने गर्नुपर्ला । संघीयतामा गइसकेपछि हामीले उच्च अदालतलाई प्रभावशाली बनाउनुपर्छ । त्यसो नगर्ने हो भने मुद्दा सर्वोच्चमा थुप्रिदै गए,” उनले भने । 

त्यसले न्याय नपाएको अनुभूति नागरिकमा बढ्दै गएको उनको भनाइ छ । गम्भीर संवैधानिक प्रश्न भएका मुद्दा मात्रै सर्वोच्चमा आउने गरी सोच्नुपर्ने उनको भनाइ छ । उनले अदालतबाट भएको फैसलाको कार्यान्वयनको तथ्य डरलाग्दो भएको बताए ।

उनले पीडितले न्याय पाएको अनुभव गर्न वर्षौं कुनुपर्ने जटिलताको अन्त्य गर्नुपर्ने बताए । कानुनमन्त्रीलाई फैसला कार्यान्वयनको जिम्मेवारी सरकारले दिनुपर्ने बताए । फैसला कार्यान्वयनका लागि प्राधिकरण गठन गर्नुपर्ने प्रस्ताव राखे ।