काठमाडौं । राष्ट्रिय स्वतन्त्र पार्टी (रास्वपा)ले आफ्नो स्थापना दिवसको दोस्रो वार्षिक उत्सवको अवसरमा सप्ताहव्यापी कार्यक्रम गर्ने भएको छ । 

पार्टी सहमहामन्त्री कविलन्द्र बुर्लाकोटीले दिएको जानकारीअनुसार दोस्रो स्थापना दिवसको अवसरमा आगामी असार १ देखि ७ गतेसम्म कार्यक्रम आयोजना गरिएको हो । वडादेखि केन्द्रसम्म विभिन्न कार्यक्रमहरू आयोजना गरी स्थापना दिवस मनाउने पार्टी सचिवालय बैठकले निर्णय गरेको उनले जानकारी दिए । 

बुर्लाकोटीका अनुसार स्थापना दिवसको अवसरमा पार्टीले नमुना कार्यक्रमहरू गर्ने पनि जानकारी दिए । पार्टीले असार १ गतेदेखि हालसालै निर्माण सम्पन्न र निर्माणाधिन भौतिक पूर्वाधारका योजनाहरूको अनुगमन गर्ने, असार ३ गते पत्रकारहरूलाई कार्यक्रमबारे जानकारी गराउने, असार ५ गते     रक्तदान कार्यक्रम, सार्वजनिक स्थलहरूको सरसफाइ कार्यक्रम गर्ने उनले बताए । साथै, असार ६ गते वृक्षारोपण र असार ७ गते चियापान कार्यक्रमको आयोजना गरिएको उनले बताए । 

“स्थापना दिवसको कार्यक्रममा केन्द्रीय समिति, विभाग, प्रदेश समिति, विभागका पदाधिकारी र सदस्यहरूलाई जिल्ला पलिकामा पुगेर कार्यक्रम आयोजना गर्न आवश्यक छलफल, सहयोग र समन्वय गरी कार्यक्रम सफल बनाउन पहलकदमी लिन अनुरोध गरिएको छ,” उनले भने । 

बुर्लाकोटीका अनुसार नुमना कार्यक्रममा सीमित नभई सम्बन्धित तहमा छलफल गरी स्रोत व्यवस्थापन सुनिश्चित गर्न र अन्य कार्यक्रम आयोजना गर्न पनि तहगत समितिलाई अनुरोध गरिएको छ । 

“रक्तदान, सरसफाइ, वृक्षारोपण, मैत्रीपूर्ण खेलकुदजस्ता कार्यक्रम गर्दा सरकारी, गैरसरकारी, निजी क्षेत्र, क्लब, संघसंस्था समुदायसँग समेत सहकार्य गर्न सकिनेछ,” उनले भने ।