काठमाडौं । आईसीसी ट्वान्टी २० विश्वकपमा स्कटल्यान्डले पहिलो जित निकालेको छ । स्कटल्यान्डले नामिबियाविरुद्ध पाँच विकेटको जित दर्ता गरेको छ ।

बिहीबार ब्रिजटाउनमा भएको खेलमा नामिबियाले प्रस्तुत गरेको १५६ रनको लक्ष्य  १८.३ ओभरमा पाँच विकेट गुमाएर पूरा गर्दै स्कटल्यान्डले प्रतियोगितामा दुई अंक सुनिश्चित गरेको हो । 

स्कटल्यान्डको जितमा कप्तान रिची बेरिङ्टनले ३५ बलमा दुई चौका र दुई छक्कासहित ४७ रन बनाए । माइकल लिएस्कले ३५, माइकल जोनसले २६ र ब्रान्डन म्याकमुलमले १९ रन थपे । 

नामिबियाका गेर्हार्ड इरास्मसले दुई विकेट लिए । रुबेन ट्रम्पेलमेनले, ब्रान्डन स्कल्ज र टांगेनी लुंगामेनीले समान एक विकेट हात पारे ।

त्यसअघि टस जितेर पहिले ब्याटिङमा आएको नामिबियाले निर्धारित २० ओभरमा नौ विकेट गुमाएर १५५ रनको योगफल खडा गरेको थियो । 

नामिबियाका कप्तान गेर्हार्ड इरास्मसले सर्वाधिक ५२ रन बनाएका थिए । जेन ग्रीनले २८, निकोलस ड्याभिनले २०, डेविड वाइजले १४ र जान फ्राइलिंकले १२ रन थपे ।

स्कटल्यान्डका ब्राड ह्विलले तीन विकेट लिए । चार ओभर बलिङ गरेका उनले ३३ रन खर्चिए । ब्राडड कुरीले दुई विकेट लिँदा क्रिस सोल, क्रिस ग्रेभेस र माइकल लिएस्कले समान एक विकेट हात पारे ।

जितसँगै दुई खेलबाट तीन अंक जोडेको स्कटल्यान्ड समूह ‘बी’को शीर्ष स्थानमा उक्लिएको छ । यसअघि पहिलो खेल इंग्ल्यान्डसँग वर्षाका कारण नतिजाविहीन भएपछि स्कटल्यान्डले एक अंक पाएको थियो । 

यता, जारी विश्वकपमा पहिलो हार व्यहोरेको नामिबिया भने दुई खेलबाट दुई अंकसहित तालिकाको तेस्रो स्थानमा छ । नामिबियाले यसअघि पहिलो खेलमा ओमानलाई सुपर ओभरमा पराजित गरेको थियो ।