काठमाडौं । नेकपा (एमाले)का प्रमुख सचेतक महेश बर्तौलाले काठमाडौं महानगरपालिकाका मेयर बालेन्द्र शाह (बालेन)का पछिल्लो अभिव्यक्तिले आफैँलाई गिज्याइरहेको टिप्पणी गरेका छन् । 

उनले एमाले अध्यक्ष एवं पूर्वप्रधानमन्त्री केपी शर्मा ओलीमाथि निम्छरो, अशिष्ट र उदण्डताका साथ अभिव्यक्ति दिएको जिकिर गरे । त्यसले उनको पदीय मर्यादालाई होचो बनाइरहेको प्रमुख सचेतक बर्तौलाको भनाइ थियो । 

मंगलबार संघीय संसद् भवन परिसरमा सञ्चारकर्मीहरूले राखेका जिज्ञासाको जवाफ दिने क्रममा उनले अध्यक्ष ओलीमाथि गालीगलौजको भाषामा बालेनले दिएको अभिव्यक्ति तत्काल सच्याउनुपर्ने समेत बताए ।

बालेनले इतिहासलाई अवमूल्यन गर्ने, नेतृत्वमाथि गालीगलौज गर्ने शैलीले मुलुकको कानुनी शासनमाथि नै चुनौती दिने गरेको भन्दै आक्रोश व्यक्त गरे । राष्ट्रको हितमा उभिएका कुनै शक्ति र व्यक्तिमाथि त्यस्ता खालको गालीगलौजको भाषा प्रयोग नगर्न पनि मेयर शाहलाई सचेत गराए ।

"यो असाध्यै गलत ढंगलबाट विषयवस्तुहरू आयो । महानगरपालिकाका मेयरजीले जुन ढंगबाट असाध्यै तल्लोस्तरबाट टिप्पणीहरू जसरी गरिरहनु भएको छ । त्यो राम्रो होइन । उहाँ स्वयंले त्यो संस्थाको गरिमालाई गिज्याइरहनु भएको छ । मेयर जस्तो एउटा सम्मानित, मर्यादित पदलाई उहाँले गरेका टिप्पणीहरूले असाध्यै होचो बनाइरहेको छ । स्वयं उहाँले सोच्नुपर्छ । एउटा युवा धेरै जनताले आशा पनि गरेको अवस्था हो उहाँप्रति । त्यसकारण त्यो भरोसा र आशा जागेर उहाँ मेयरको त्यति महत्त्वपूर्ण गरिमामय जिम्मेवारीमा हुनुहुन्छ । तर उहाँले यो देशको नेतृत्वहरुप्रति, पूर्वप्रधानमन्त्रीप्रति जुन ढंगबाट सधैँ निम्छरो तरिकाले अशिष्ट, उदन्ड तरिकाका साथ जे प्रस्तुती गरिरहनु भएको छ । यो राम्रो छैन," उनले भने । 

प्रमुख सचेतक बर्तौलाले राज्यका विद्यमान कानुनी प्रबन्धहरूलाई कुनै पनि व्यक्तिले चुनौती दिन नमिल्ने पनि बताए ।