![बजेटले जनताको निराशा चिर्न र विकल्प दिन सकेन : सांसद पोखरेल](https://12khari.top/uploads/posts/Rishikesh_Pokhrel-1717405140.png)
काठमाडौं । सत्ता साझेदार दल नेकपा एमालेका सांसद ऋषिकेश पोखरेलले बजेटले जनताको निराशा चिर्ने र जनतालाई विकल्प दिने बाटो पहिल्याउन नसकेको बताएका छन् । सोमबारको प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमान (बजेट)माथिको सामान्य छलफलमा बोल्दै यस्तो बताएका हुन् ।
उनले कार्यशैली र मनोविज्ञान नबदले रुपान्तरण गर्न नसक्ने भन्दै नागरिकलाई विकल्प दिने काम बजेटको भएको बताए । उनले बहुदल र संघीयता आएपछि आमनागरिकमा असन्तुष्टि, निराशा किन छ ? भन्ने प्रश्न गर्दै नीति तथा कार्यक्रम र बजेटमार्फत त्यसलाई सम्बोधन हुने गरी बजेट ल्याइनुपर्ने धारणा राखे ।
उनले बजेटको अध्ययन अनुसन्धान कहाँ कसले गर्यो, तथ्य र प्रमाण के हुन् भन्दै बजेटमा जवाफदेहिता कसको हुन्छ भन्ने प्रश्न तेर्साए । “बजेट प्रस्तुत गरेका छौँ । तर, जवाफदेही र जिम्मेवारी ग्रहण गर्न सकेनौँ गम्भीर भुल हो,” उनले भने ।
संसद्को सार्वजनिक लेखा समिति सभापति समेत रहेका उनले राजस्व १२ खर्ब ६० अर्ब उठाउने भन्दैमा नबढ्ने भन्दै अनेक प्रश्न गरे । “राजस्व कसरी बढ्छ अध्ययन अनुसन्धान कहाँ भयो ? यसमा प्राविधिक परिवर्तन आधार तय गर्यौँ ? चुहावट रोक्न केही गर्यौँ ?,” उनले प्रश्न गरे, “कर तिर्नेले खुसीले तिर्न पाउने परिस्थिति बन्यो ? कर प्रणालीलाई छलफल गर्ने अधिकार संसद्लाई छ कि छैन ?”
उनले ऋण लिएर ऋणकै सावाँ व्याज तिर्न बन्द गर्नुपर्ने भन्दै वैदेशिक अनुदान मुलुकको टेजरीमा कसरी ल्याउने ? भन्ने विषयमा छलफल हुनुपर्ने बताए ।