![जलवायु परिवर्तनको असरबारे संसद्भित्र छलफल गरौँ : सांसद सापकोटा](https://12khari.top/uploads/posts/Madhav-Sapkota-1717311389.jpg)
काठमाडौं । नेकपा (माओवादी केन्द्र)का सांसद माधव सापकोटाले जलवायु परिवर्तनको असरहरूको सम्बन्धमा संसद्भित्र छलफल गर्नुपर्ने बताएका छन् ।
आइतबार प्रतिनिधिसभा बैठकको विशेष समयमा सांसद सापकोटाले जलवायु परिवर्तनको क्षेत्रमा रहेका असर र प्रभावहरूका सम्बन्धमा संसद्मा छलफल हुनुपर्ने बताएका हुन् ।
उनले यसको सम्बन्धमा संसद्को भूमिका के रहने भन्नेमा पनि निष्कर्ष निकालेर अघि बढ्नुपर्ने बताए । जलवायु परिवर्तनको असर, प्रभाव र त्यसको न्यूनीकरणको सम्बन्धमा संसद्ले पनि आफ्नो भूमिकालाई प्रभावकारी ढंगले सम्पादन गर्नुपर्ने उनको भनाइ छ ।
"सरकारको गम्भीरतापूर्वक ध्यानाकर्षण गराउन चाहान्छु कि, ०७८ साल असार १ गते जुन बाढी, पहिरो आयो सबैभन्दा पहिला त त्यो करिडोर क्षेत्रका इन्द्रावती र मेचम्ची क्षेत्रका बासिन्दाहरूले पाउनुपर्ने क्षतिपूर्ति र राहतलगायतका विषयहरूका बारेमा कुनै सम्बोधन भएको छैन । यसका बारेमा सम्बोधन होस् । त्यो सँगसँगै आउँदै गरेको वर्षात्का जोखिमहरू र त्यसका पूर्वतयारीका बारेमा सरकारले गम्भीरतापूर्वक ध्यानाकर्षण होस् । सरकारले यसबारेमा सोचोस्," उनले भने ।