काठमाडौं । नेकपा (एमाले)का उपाध्यक्ष अष्टलक्ष्मी शाक्यले महिलाहरूलाई सुरक्षित ढंगले नेतृत्व विकास कसरी गराउने भन्ने विषयमा पार्टीमा छलफल हुनुपर्ने बताएकी छन् । काठमाडौंको कमलादीस्थित प्रज्ञा भवनमा आयोजित राष्ट्रिय महिला भेलामा नेतृत्व विकासका लागि महिला सुरक्षित हुनुपर्ने बताइन् । 

“अहिले संघीय लोकतान्त्रिक गणतन्त्रमा सामाजिक सुरक्षा, नैतिकताको पाटो समस्या बनेर आइरहेको छ । जहाँ महिला सुरक्षित हुँदैनन्, त्यहाँ महिलाहरूले नेतृत्व विकास गर्न सक्दैनन्,” उनले भनिन् । 

नैतिकता, चरित्रको समस्याको पाटोले मर्यादित समाज र संगठन बनाउन नसकिने बताइन् । नेतृत्वले रुपान्तरित सोचबाट अघि बढ्नुपर्ने उनको भनाइ छ । उनले भूमिगतकालमा महिलालाई पार्टीले संरक्षण गरेको स्मरण गरिन् । “थोरै महिलाहरू भूमिगत हुनुहुन्थ्यो । कम्युनिस्ट पार्टीमा लागिरहँदा हामी धेरै सुरक्षित थियौँ,” शाक्यले भनिन्, “महिलाहरूको चरित्र, नैतिकताका सवालमा पार्टीले छाता ओडाएको जस्तो झ्याप्पै ओडाउँथ्यो । त्यति माया गर्थ्यो ।  त्यति संरक्षण दिन्थ्यो ।”