काठमाडौं । ट्वान्टी–२० विश्वकप क्रिकेटमा सहभागी हुन क्रिकेटर सन्दीप लामिछानेलाई अमेरिकाले भिसा दिनुपर्ने माग राख्दै काठमाडौंमा प्रदर्शन गरिएकाे छ । अमेरिकामा हुने विश्वकप क्रिकेटमा सहभागी हुन सन्दीपलाई भिसा दिनुपर्ने भन्दै काठमाडौंस्थित अमेरिकी दूतावासलाई दबाब दिन बुधबार प्रदर्शन भएको हो ।

केही दिनअघि आफूलाई अमेरिकाले भिसा नदिएको सन्दीपले सामाजिक सञ्जाल मार्फत जानकारी दिएका थिए । यसपछि खेलकुद मन्त्रालयले परराष्ट्र मन्त्रालय मार्फत सन्दीपलाई भिसा दिलाउन पहल गरेको बताइएको थियो । तर, हालसम्म सन्दीपले भिसा नपाएपछि बुधबार प्रदर्शन भएको हो । 

प्रदर्शनकारीले सन्दीपलाई विश्वकप खेल्न जान भिसा दिनुपर्ने माग गरेका छन् । माइतीघर मण्डलामा जम्मा भएका प्रदर्शनकारी सन्दीपलाई भिसा नदिनुको कारणबारे बुझ्न अमेरिकी दूतावास जाने भन्दै हिँडेका छन् ।