काठमाडौं । नेपाली कांग्रेसका नेता कृष्णप्रसाद सिटौलाले प्रतिपक्षले जनताको आवाज उठाउँदा सरकारले पेलेर जाने भए कांग्रेस चुनौती सामना गर्न तयार रहेको बताएका छन् ।

आइतबार काठमाडौंमा आयोजित एक कार्यक्रमलाई सम्बोधन गर्दै नेता सिटौलाले कांग्रेससहितका प्रतिपक्ष दलहरुले संसद्‌मा उठाएका आवाजलाई सरकारले नजरअन्दाज गरे उक्त प्रवृत्तिलाई सामना गर्न कांग्रेस तयार रहेको बताए । सरकार पेलेर जाने हो भने कांग्रेस सहेर नबस्ने उनको चेतावनी छ । 

उनले सरकारले जनताको हितमा काम गर्नुपर्ने र प्रतिपक्षले जनताका आवाज उठाउनुपर्ने बताए । जनतका हितमा काम नगर्ने सरकार र जनताका आवाज नउठाउने प्रतिपक्ष छिटै सकिने भन्दै उनले प्रतिपक्षले जनतालाई संविधानले दिएको अधिकारको कुरा संसद्‌मा निरन्तर उठाउनुपर्ने बताए । 

उनले कांग्रेसले आफू मात्रै अन्याय भएको महसुस नगरेको भन्दै आमजनतामा अन्याय भएको कुरा कांग्रेसले उठाएको बताए ।

“सरकारले जनताको हितमा काम गर्नुपर्छ। संविधानले जनतालाई दिएको हकहरुलाई प्रचलनमा ल्याउनुपर्छ । प्रतिपक्षले जनताको आवाज जनतालाई संविधानले दिएको अधिकारको कुरा प्रतिपक्षले संसद्‌मा निरन्तर उठाउनुपर्छ । प्रतिपक्षले कुरा उठाएन प्रतिपक्ष सिद्धियो । सरकारले जनताको हितमा काम गरेन, सरकार सिद्धियो । प्रतिपक्षले प्रतिपक्षमा नेपाली कांग्रेसबाहेकका केही दलहरु पनि छन् । प्रतिपक्षले संसद्‌मा जनताका आवाज उठाइरहेको छ । आवाज बुलन्द गरेको छ । सरकारले यसलाई छिटै गम्भीरतापूर्वक लिएर अघि बढ्नुपर्छ । सरकार पेलेरै जान खोज्छ भने पेलेर जाने प्रवृत्तिलाई हामीले त्यो चुनौतीलाई सामना गर्नेछौँ । हामीले भनेका पनि छौँ । सरकार साँच्चै यसै ढंगले गइराख्ने हो भने कांग्रेस तयार छ । कांग्रेस सहेर त बस्न सक्दैन । कांग्रेसले आफू मात्रै अन्याय भएको महसुस गरेको छैन, आमजनतामा अन्याय भएको कुरा कांग्रेसले उठाएको छ,” उनले भने ।