काठमाडौं । प्रहरीको उपत्यका अपराध अनुसन्धान कार्यालय ललितपुरको टोलीले जेठ ३ गते चोरीमा संलग्न एक समूहलाई पक्राउ गर्‍यो । उक्त समूहले वैशाख ९ मा ललितपुर महानगरपालिका–२१, खोकनास्थित नवराज गुरुङको घरबाट सुनचाँदीका गरगहना, नगद तथा मोबाइल समेत चोरी गरेका थिए ।

प्रहरीले चोरी गर्ने समूहको खोजी तीव्र पार्‍यो । करिब तीन हप्ताको नियमित खोजीपछि चोरीमा संलग्न ६ जनालाई पक्राउ गर्न सफल भएको हो । चोरीमा संलग्न समूहलाई पक्राउ गर्न कार्यालयको टोली रामेछाप समेत पुगेको थियो ।

प्रहरीले चोरी गर्ने समूहका नाइके ३७ वर्षीय कमल थापा मगरलाई रामेछाप दोरम्बा गाउँपालिका–४, गौसराबाट पक्राउ गरेको हो । त्यस्तै, अन्य पाँचजना भने ललितपुर र काठमाडौंको विभिन्न ठाउँबाट पक्राउ परेका थिए ।

पक्राउ पर्नेहरूमा रामेछाप दोरम्बाकै ३५ वर्षीय धनलाल थापामगर, सिन्धुपाल्चोकका मेलम्चीका २८ वर्षीय सुवास सुनार, काठमाडौं कागेश्वरी मनहरा नगरपालिका–६, का रेशक विक, काठमाडौं टोखाका ४१ वर्षीय योगेश डाँगी र सप्तरीका २२ वर्षीय मोहम्मद समिर छन् ।

उनीहरूमाथि जिल्ला प्रहरी कार्यालय ललितपुरले थप अनुसन्धान अघि बढाएको छ । प्रहरीको टोलीले उनीहरूको साथबाट सुनको सिक्री, क्रिष्टलजडित सुनसहित अन्य विभिन्न सुनका गरहगना गरेर ३५ थान, चाँदीको गहना एक थान र नगद २४ हजार रुपैयाँसमेत बराद गरेको छ ।

प्रहरीको अनुसन्धानका क्रममा चोरीमा संलग्न रामेछाप दोरम्बाका कमल थापा मगर र धनलाल थापामगर मुख्य आरोपी भएको खुलेको छ ।

यस्तो छ मगरद्वयको चोरीको श्रृंखला

चोरी मुद्दामा पक्राउ परेका कमल र धनलालमाथि अनुसन्धान जारी राखेको ललितपुर प्रहरी आफैँ चकित परेको छ । कमल र धनलालले १८ वर्षअघिदेखि नै चोरी धन्दामा लागेको ‘पकटे’ भएको खुलेको हो ।

पक्राउ परेका कमल यसअघि नै १८ पटक चोरीडकैती मुद्दामा पक्राउ परेर छुटेको खुलेको छ । त्यस्तै, धनलाल पाँचपटक पक्राउ परेर छुटेको खुलेको उपत्यका प्रहरी कार्यालयका एसपी रवीन्द्र रेग्मीको भनाइ छ ।

प्रहरीले राखेको क्रिमिनल रेकर्ड (सीआरएस) मा कमल पहिलोपटक २०६३ मा डाँका चोरीमा पक्राउ परेको देखिएको छ । त्यसपछि भने उनको चोरी र लुटापाटको श्रृंखला अहिलेसम्म चलेको हो । 

प्रहरीको रेकर्डले उनी दोस्रोपटक २०६४ जेठ ११ मा पक्राउ परेको देखाएको छ । चोरी र डाँका मुद्दामा २०६४ मा तीनपटक पक्राउ परेका थिए । त्यसरी पक्राउ पर्दै जेल बस्दै छुट्दै आएका कमल सुध्रिने बाटो तिर लागेनन् ।

उनी फेरि २०७१ भदौ १ मा पुन पक्राउ परे । सो श्रृंखलालाई उनले नियमति राखे । २०७८ सालमा मात्रै उनी चोरी मुद्दामा पाँचवटा घटनामा संलग्न भएको खुलेको छ ।

पछिल्लो समय २०८० भदौ १७ मा प्रहरी वृत्त सिंहदरबारले चोरी मुद्दामा नै उनलाई पक्राउ गरेको खुलेको हो । फेरि एक वर्ष नहुँदै ललितपुरको अर्को चोरीको घटना उनी हाल प्रहरीको थुनामा छन् ।

त्यस्तै, धनलाल समेत पहिलोपटक ०६६ सालमा काठमाडौं प्रहरीले चोरी मुद्दामा पक्राउ गरेको देखिएको छ । त्यसयता उनी पनि पटक–पटक गरी पाँच चोरीको घटनामा संलग्न भएको खुलेको हो । उनीहरूले चोरी गरेर नै हाइफाइ जीवन बिताइरहेको प्रहरीले जनाएको छ ।

पटक–पटक पक्राउ पर्दा पनि किन चोर्न छाड्दैनन्

हाल पक्राउ परेका कमल र धनलाल खान नपाएर खानाका लागि चोरी गर्दै हिड्ने समूह होइन् । उनीहरु पेसेवर ‘चोर’ हुन् । प्रहरीको अनुसन्धानले उनीहरूले चोरी धन्दामै लागेर लाखौँ रुपैयाँ जम्मा गरेको तथा चोरीको रकमले मोजमस्ती गर्नेदेखि जुवा खेल्ने गरेको खुलेको छ । त्योबाहेक सजिलै पैसा कमाउने उद्देश्यले चोरीमा संलग्नहरू चोर्र्दै हिड्ने गरेको प्रहरीको भनाइ छ ।

२०७४ को मुलुकी अपराध संहिताको २४३ को दफाअनुसार नकबजनी चोरी गर्नेलाई तीनदेखि पाँच वर्ष कैद र ३० हजारदेखि ५० हजार जरिबाना हुने व्यवस्था गरेको छ । त्योबाहेक तीनजनाभन्दा बढीको समूहले डकैती गरेमा सातदेखि १० वर्ष र हतियार देखाएर डकैती गरेमा भने सातदेखि १४ वर्ष कैद सजायको व्यवस्था गरेको छ ।

अनुसन्धान कार्यालका एसपी रेग्मीले यसअघिको कानुनमा चोरी मुद्दामा सामान्य धरौटीमा छुट्दै आएका कारण उनीहरूले चोरी नै पेसा बनाएको दाबी गरे ।