![कारको ठक्करबाट दुईजनाको मृत्यु, चालक नाबालकलाई ‘निबन्ध’ लेख्ने सर्तमा जमानत](https://12khari.top/uploads/posts/car-india-1716348677.jpg)
पुणे। भारत महाराष्ट्रको पुणेमा एक नाबालकले तीव्र गतिमा चलाएको पोर्स कारले मोटरसाइकललाई ठक्कर दिँदा दुईजनाको मृत्यु भएको घटनामा संलग्न नाबालकलाई ‘निबन्ध’ लेख्ने सर्तमा अदालतले जमानत दिएको छ ।
१८ मे का दिन पुणेको कल्याणीनगरमा सो दुर्घटना भएको थियो । सो घटनामा बाइकमा सवार अनिष अवधिया र अश्विनी कोस्टा दुवैको मृत्यु भएको थियो । ती नाबालकले मादक पदार्थ सेवन गरेर कार चलाएको पाइएको थियो ।
सो मामिलामा नाबालकका बुबा र उनी मादक पदार्थ सेवन गर्न गएको पबका म्यानेजर र कर्मचारीविरुद्धमा प्रहरीले मुद्दा दर्ता गरेको छ । प्रहरीले गएको सोमबार नाबालकका बुबासहित चारजनालाई पक्राउ गरेको थियो । राति साढे २ बजे नाबालकले चलाएको कारले मोटरसाइकललाई ठक्कर दिएको थियो ।
सोसम्बन्धी मुद्दामा स्थानीय अदालतले नाबालकले १५ दिनसम्म ट्राफिक प्रहरीका साथ रहेर बाटोमा ट्राफिकलाई मद्दत गर्नुपर्ने र सोसम्बन्धी रिपोर्ट बनाउनुपर्ने, सडक दुर्घटना र त्यसको समाधानको विषयमा ३०० शब्दको निबन्ध लेख्नुपर्ने, मादक पदार्थ सेवन रोक्नका लागि मनोचिकित्सकसँग परामर्श गर्नुपर्ने र भविश्यमा कुनै दुर्घटना भएको देखेमा पीडितलाई मद्दत गर्नुपर्ने सर्त राखेको छ ।
सो सर्त मानेपछि ती नाबालकलाई जमानत मिलेको बताइएको छ । भारतको कानुनमा त्यसप्रकारको घटनामा बाबु आमालाई दोषी मानिने गरेको जनाइएको छ । बीबीसी