काठमाडौं । नेपाली कांग्रेसका नेता शेखर कोइरालाले कान्तिपुर मिडिया ग्रुपका अध्यक्ष कैलाश सिरोहियालाई प्रतिशोध साँध्न पक्राउ गरिएको टिप्पणी गरेका छन् ।

मंगलबार साँझ प्रहरीले थापाथलीस्थित कान्तिपुरको मुख्यालयबाटै सिरोहियालाई पक्राउ गरेपछि नेता कोइरालाले सामाजिक सञ्जालबाट प्रतिशोध साँध्न गरिएको पक्राउ स्वीकार्य नभएको बताएका हुन् ।

"आफू दोहोरो पासपोर्ट लिँदै हिँड्ने र सहकारी ठगीको आरोपविरुद्ध छानबिन हुन नदिने, तर तीन दशकदेखि सूचना प्रवाह र लोकतन्त्रको पहरेदार भई उभिएको कान्तिपुरका अध्यक्ष सिरोहियामाथि प्रतिशोध साँध्न गरिएको पक्राउ स्वीकार्य छैन," उनले एक्समा लेखेका छन् ।

प्रहरीले सही र गलत छुट्ट्याउनेमा आफू विश्वस्त रहेको उनको भनाइ छ ।

यसअघि सिरोहियाका दुईवटा नागरिकता रहेको भन्दै गृह मन्त्रालयले अनुसन्धानका लागि प्रहरीलाई निर्देशन दिएलगत्तै धनुषा प्रहरीले पक्राउ पुर्जी जारी गरेको थियो । 

धनुषा प्रहरीको अनुरोधमा उपत्यका अपराध कार्यालयका एसपी रवीन्द्र रेग्मीको कमान्डमा कान्तिपुरको हेडक्वाटर पुगेको प्रहरी टोलीले सिरोहियालाई मंगलबार साँझ पक्राउ गरेको हो ।