वासिङटन । अमेरिकी अभियोजकले एक अमेरिकी महिलालाई  उत्तर कोरियालीलाई ‘रिमोट जब’ उपलब्ध गराएर तलब उत्तर कोरिया पठाउन मद्धत गरेको अभियोग लगाएका छन् । क्रिश्चियन च्यापम्यान र अन्य तीन उत्तर कोरियाली उक्त कार्यमा संलग्न भएको बताइएको छ । 

एरिजोनामा बस्दै आएकी ती महिलाले अवैध ढंगले अमेरिकी नागरिकको परिचय चोरेर विदेशी ‘आइटी वर्कर्स’लाई दिइएको र अमेरिकी नागरिकको  हैसियतमा विभिन्न कम्पनीमा काम गरेको अभियोजकले जनाएका छन् । 

च्यापम्यानलाई अमेरिकामा ठगीको षडयन्त्र गरेको अभियोग लगाइएको छ । अनुसन्धानमा अनौठो लाग्ने त्यो स्किममा ६० जनाको परिचय चोरी गरिएको र झण्डै सात मिलियन डलर रकम जम्मा गरी उत्तर कोरिया पठाएको पाइएको उल्लेख छ । सभवतः उक्त रकम उत्तर कोरियाको हतियार कार्यक्रमलाई योगदान गर्नका लागि हुनसक्ने अनुमान छ । 

उक्त स्किममा करिब ३०० अमेरिकी कम्पनी मुछिएका छन् । यस खालको काम सन २०२० को अक्टोबरबाट सुरु भएको र ती कामदार सूचना प्रविधि(आईटी) सम्बन्धी ‘हाइली स्किल्ड’ कामदार भएको जनाइएको छ । 

ती कम्पनीहरू यो स्किमबारे जानकार नरहेको बताइएको छ । उनीहरूको पहिचान पनि दिइएको छैन । तर, ती कम्पनीमा केही फर्चुन ५०० कम्पनी, एउटा प्रमुख टेलिभिजन नेटवर्क, इन्डिक्टा डिफेन्स कम्पनी, एक सिलिकन भ्याली टेक कम्पनी, एक अमेरिकन अटो म्यानुफ्याक्चररलगायत भएको जनाइएको छ ।
 
४९ वर्षिया च्यापम्यानले घरमा ल्यापटप फार्म नै खोलेको तथा त्यहीँबाट उनले कम्पनीबाट ईश्यू गरेका ल्यापटप खोल्ने र त्यो उत्तर कोरियन कामदारले अर्कै देशबाट ‘फिजिकल्ली’ अमेरिकामा रहेको देखिने गरी चलाउने गरेको जनाइएको छ । ती महिलाले ‘रिमोट्ली कनेक्ट’ गर्ने समेत उल्लेख छ । कम्पनीबाट तलब लिने व्यवस्था समेत त्यसैगरी गरिएको ५७ पेजको अभियोग कागजातमा उल्लेख  छ ।

जागिर मिलाइदिएबापत च्यापम्यानले ओभरसिज आईटी कामदारसँग मासिक रुपमा रकम लिने गरेको अभियोगपत्रमा उल्लेख छ । यो अभियोग रिमोटबाट आईटी क्षेत्रको काम लगाउने अमेरिकी कम्पनी र सरकारी एजेन्सीलाई ‘वेकअप कल’ भएको अमेरिकी न्याय मन्त्रालयमा फौजदारी डिभिजनका प्रमुख निकोल अर्जेन्टाइरीले बताएकी छन् । 

अधिकारीहरूका अनुसार च्यापम्यानलाई २०२० को मार्चमा अज्ञात व्यक्तिले फोन गरेर आफ्नो कम्पनीको ‘बी द यूएस फेस’ भनेका थिए । च्यापम्यानबाहेक उत्तर कोरियाली नागरिकहरू जीहो हान, चुन्जी जीन र हाओरोन सु पनि उक्त ठगीमा संलग्न रहेको जनाइएको छ । ती सबै उत्तर कोरियाको हतियार उद्योग विभागसँग सम्बन्धित भएको अमेरिकी विदेश मन्त्रालयले उल्लेख गरेको छ । उक्त विभागले त्यहाँ बलिस्टिक मिसाइल र हतियार उत्पादनको काम गरिरहेको जनाइएको छ ।

च्यापम्यानलाई बिहीबार एरिजोनाबाट पक्राउ गरिएको र उनको तर्फबाट बोल्ने वकिल नियुक्त गरे अथवा नगरेको खुलेको छैन बीबीसी