काठमाडौं । नेपाल बार एसोसिएसनले शुक्रबार (भोलि)देखि सुरू हुने कानुन व्यवसायीहरूको राष्ट्रिय सम्मेलनको तयारी पूरा भएको जनाएको छ । नेपाल बारले बिहीबार काठमाडौंमा पत्रकार सम्मेलन गर्दै जेठ ६ गतेसम्म काठमाडौंको प्रज्ञा प्रतिष्ठानमा हुने १६औँ अखिल नेपाल कानुन व्यवसायी राष्ट्रिय सम्मेलन २०८१ को तयारी पूरा भएको जनाएको हो ।

‘सक्षम कानुन व्यवसायी, मर्यादित बार : न्यायपालीकाको पुनसंरचना लोकतन्त्र सुदृढीकरणको आधार’ भन्ने नाराका साथ सम्मेलनको आयोजना गरिएको बारका अध्यक्ष गोपाल कृष्ण घिमिरेले जानकारी दिए । 

न्याय प्रशासनलाई आधुनिकीकरण, विकसित, स्वच्छ, निष्पक्ष तथा न्याय उन्मुख बनाउन सम्मेलन कोशेढुंगा हुने उनले बताए । उनले न्यायापालिकामा व्याप्त विकृति, विसंगति र भ्रष्टाचार अन्त्यको निम्ति न्यायपालिकाको पुनसंरचना अपरिहार्य रहेको धारणा राखे । 

सम्मेलनका क्रममा कानुनको अध्ययन तथा अनुसन्धानमा स्थापित निकायहरूको तर्फबाट कार्यपत्र प्रस्तुत हुने कार्यक्रम रहेको बारले जनाएको छ ।

नेपाल बार एसोसिएसनको गएको मंसिर २४ र २५ गते चितवनमा सम्पन्न केन्द्रीय कार्यकारिणी परिषद्को बैठकले सर्वोच्च अदालतका न्यायाधीशहरूको पदावधिको सम्बन्धमा एक अध्ययन समिति गठन गरी सोसम्बन्धी निर्णय लिनका लागि सम्मेलनमा प्रस्ताव पेस गर्ने उनको भनाइ छ ।