काठमाडौं । गोली हानी हत्या प्रयास गरिएका युरोपेली मुलुक स्लोभाकियाका प्रधानमन्त्री रोबर्ट फिकोकोे स्थानीय अस्पतालमा गम्भीर अवस्थामा उपचार भइरहेको छ । एक सरकारी बैठकबाट बाहिरिने क्रममा बुधबार हैंडलोवा भन्ने सहरमा उनीमाथि गोली प्रहार गरिएको थियो ।

स्लोभाकियाका रक्षामन्त्री रोबर्ट कलिनकका अनुसार, गोली लागेपछि तीन घण्टासम्म अस्पतालमा प्रधानमन्त्री फिकोको सर्जरी गरिएको थियो । अहिले स्वास्थ्य अवस्था खराब छ ।

स्लोभाकियाका राष्ट्रपति र अरू नेताले यो आक्रमणलाई लोकतन्त्रमाथिको हमला भन्दै निन्दा गरेका छन् । आक्रमणकारीलाई प्रहरीले तुरुन्तै पक्राउ गरे पनि उनीबारे जानकारी गराइएको छैन ।

उता, स्लोभाकियाका उपप्रधानमन्त्री थोमस तराबाले अस्पतालमा प्रधानमन्त्रीको राम्रोसँग उपचार भइरहेको जनाएका छन् । उनले भनेका छन्, “मलाई लाग्छ, प्रधानमन्त्री बाँच्नुहुन्छ । उहाँको जीवन खतरामा छैन ।”

गृहमन्त्री मेटस सुतज एस्तोकले प्रधानमन्त्रीलाई पेटमा गोली लागेको जनाएका छन् । प्रारम्भिक अनुसन्धानबाट आक्रमण राजनीतिकप्रेरित रहेको संकेत मिलेको उनले जनाएका छन् ।

७१ वर्षीय वृद्ध आक्रमणकारी !
केही अपुष्ट मिडिया रिपोर्टले आक्रमणकारी ७१ वर्षीय लेखक तथा राजनीतिक कार्यकर्ता भएको जनाएका छन् । स्लोभाकियाको मिडियामा व्यापक रूपमा प्रचारित एक भिडियोमा संदिग्ध आक्रमणकारीलाई देखाइएको छ । फुटेजमा देखाइएका व्यक्ति सरकारी नीति र मिडियामा सरकारको व्यवहारप्रति असहमत रहँदै आएका थिए ।

५९ वर्षीय प्रधानमन्त्री फिको गएको सेप्टेम्बरमा भएको निर्वाचनबाट पपुलिस्ट नेसनलिस्ट गठबन्धनको नेताका रूपमा सत्तामा आएका हुन् । प्रधानमन्त्रीका रूपमा उनको कार्यकाल निकै विवादास्पद छ ।

उनले यसै वर्षको जनवरीमा युक्रेनलाई दिइएको सैन्य सहायता रोकेका थिए । हालै सरकारी प्रसारक आरटीबीएसलाई अन्त्य गर्ने योजनातर्फ उनी अघि बढेका थिए । पछिल्ला सातामा स्लोभाकियाका हजारौँ जनताले सरकारी प्रसारकसँग जोडिएको योजनाको विरोध गरेका थिए । बीबीसी हिन्दीबाट ।