काठमाडौं । नेकपा (एकीकृत समाजवादी)ले पार्टी संगठन निर्माणमा देखिएको समस्या पहिल्याएको छ । जारी केन्द्रीय कमिटी बैठकमा महासचिव घनश्याम भुसालले प्रस्तुत गरेको संगठनात्मक प्रस्तावमा पार्टी निर्माणमा ११ समस्या देखिएको उल्लेख छ । 

एमालेबाट विभाजित हुँदा कसलाई कुन जिम्मेवारी दिने भन्ने मापदण्ड नबनाइएकाले अहिले समस्या उत्पन्न भएको प्रस्तावमा उल्लेख छ । “एकै समयमा देशैभरी कमिटीहरू बनाउनु पर्ने अवस्थामा कसलाई कुन जिम्मेवारी दिने भन्ने मापदण्ड बनाउँदा विद्रोहको बेला देखिएको तत्कालीन सक्रियतालाई ध्यान दिनु स्वाभाविक थियो । तर, विद्रोहको समयको सक्रियता विचार, सिद्धान्त र राजनीतिक तथा सांगठनिक योग्यता र अनुभवबिना लामो समय टिकाउन सजिलो हुँदैन,” प्रस्तावमा भनिएको छ, “विद्रोहलाई व्यवस्था र विधिमा ढाल्नु पर्ने अवस्थामा ती कमजोरीहरू विभिन्न क्षेत्रमा देखिँदै गएका छन् । त्यसले गर्दा कतिपयमा कमिटीमा नकारात्मक प्रभाव परेका छन् ।” 

त्यस्तै, एमालेमा रहेको गुटबन्दीले किनारामा परेका कार्यकर्ताहरू पार्टीमा आएको बताइएको छ । जिम्मेवारी र क्षमतामा तालमेल नहुँदा माथिल्लो पदमा रहेका कतिपय नेताहरूले सांगठनिक जिम्मेवारी पूरा गर्न नसक्ने अवस्था देखिएको सांगठनिक प्रस्तावमा उल्लेख छ । 

त्यस्तै, गएको ०७९ को निर्वाचनमा गठबन्धनमा निर्भर रहँदा पार्टी निर्माणको काम ओझेलमा परेको भुसालको ठम्याइ छ । निर्वाचनमा अपेक्षित नतिजा नआउँदा पार्टीमा आकर्षण कम हुँदै गएको प्रस्तावमा उल्लेख छ । “स्थानीय र संघीय निर्वाचनमा हामीले अपेक्षित उपलब्धि हासिल गर्न सकेनौँ । जसले गर्दा पार्टीमा उर्जा र आकर्षण कम हुँदै गयो । त्यसलाई चिरेर नयाँ उर्जा सिर्जना गर्न अझै धेरै परिश्रम गर्नुपर्नेछ,” प्रस्तावमा भनिएको छ ।

संगठनको माथिल्लो तहमा नै समस्या भएपछि तल्ला कमिटीहरूलाई जनवादी केन्द्रीयताअनुसार सञ्चालन गर्न कठिनाइ रहेको उल्लेख छ । कमिटी र पद्धतिमाथि व्यक्ति र तदर्थवाद हावी हुने अवस्था अझैसम्म कायम रहनु समस्या रहेको प्रस्तावमा उल्लेख छ । पार्टीमा रहेको सांगठनिक तथा राजनीतिक कमजोरीहरूले गर्दा त्यो आकर्षण क्रमशः कमजोर हुँदै गएको ठम्याइ प्रस्तुत गरिएको छ । संसद् र सरकारमा पार्टीको अपेक्षित भूमिकालाई अझैसम्म स्थापित गर्न नसकिएको स्वीकार गरिएको छ ।