काठमाडौं । गुजरात जायन्ट्सविरुद्धको खेल रद्द हुँदा इन्डियन प्रिमियर लिग (आईपीएल)मा कोलकाता नाइट राइडर्सले शीर्ष दुईमा स्थान निश्चित गरेको छ । सोमबार अहमदाबादस्थित नरेन्द्र मोदी रंगशालामा हुने तय भए पनि वर्षाका कारण टस समेत नभई खेल रद्द भएको हो ।

खेल रद्द हुँदा दुवै टिमले समान एक अंक बाँड्दा कोलकाताले तालिकाको शीर्ष दुई स्थान निश्चित गरेको छ । खेल रद्द हुँदा साविक उपविजेता समेत रहेको गुजरात टाइटन्सको भने प्लेअफमा पुग्ने सम्भावना समाप्त भएको छ ।

तालिकाको शीर्ष स्थानमा आसीन कोलकाताले १३ खेलबाट १९ अंक जोडेको छ । त्यो दोस्रो स्थानको राजस्थान रोयल्सको भन्दा तीन अंक धेरै हो । राजस्थानले १२ खेलबाट १६ अंक जोडेको छ ।

प्रतियोगिताको प्लेअफ दौडबाट बाहिरिएको गुजरात १३ खेलबाट ११ अंकसहित आठौँ स्थानमा छ । गुजरात प्लेअफ दौडबाट बाहिरिने तेस्रो क्लब बनेको हो । मुम्बई इन्डियन्स र पञ्जाब किंग्सको पनि प्लेअफ सम्भावना समाप्त भइसकेको छ ।