काठमाडौं । “खेलाडीले एकआपसमा बनाएको एकजुट र जित्नैपर्छ भन्ने भावनाले गर्दा कर्णालीलाई राष्ट्रिय लिगसम्म पुर्‍याउन सफल भयौँ । महिला फुटबलमा कर्णाली पछि छ भन्ने नेपाली मानसिकता चिर्न सफल भयौँ,” सुर्खेतमा भएको राष्ट्रिय महिला लिगबाट कर्णालीलाई राष्ट्रिय लिगसम्म उकाल्न सफल भएपछि कप्तान सिर्जनासिंह ठकुरीले बाह्रखरीसँग यसरी आफ्नो खुसी पोखिन् ।

कर्णालीकै राजधानी सुर्खेतमा वैशाख ७ देखि २१ गतेसम्म भएको राष्ट्रिय महिला लिगको छनोटमा कर्णालीले सबैलाई चकित तुल्याउँदै तेस्रो स्थानसहित राष्ट्रिय लिगसम्मको यात्रा तय गर्‍यो । कर्णालीले लिगको अन्तिम खेल खेल्न बाँकी हुँदा सबै खेल खेलिसकेको मधेस १० अंकसहित तालिकाको तेस्रो स्थानमा थियो । यसैकारण राष्ट्रिय लिगमा छनोट हुन अन्तिम खेलमा गण्डकीविरुद्ध सुदूरपश्चिमलाई जित्नैपर्ने दबाब थियो । वैशाख २० गते प्रदेश राजधानीमा गण्डकीविरुद्ध २–० को जित निकालेपछि कर्णाली मधेसलाई पछि पार्दै राष्ट्रिय लिगमा छनोट हुने तेस्रो टोली बन्यो ।

लिग सुरु हुनुअघि कर्णालीले राष्ट्रिय लिगमा स्थान बनाउने भन्ने कल्पना सायदै कसैको थियो । प्रतियोगितामा मधेस, कोसी र सुदूरपश्चिमजस्ता बलिया प्रदेशको उपस्थितिले पनि कर्णाली छनोट हुन्छ भन्ने कसैको अड्कल थिएन । तर, कप्तान सिर्जनामा भने आफ्नो टिमलाई राष्ट्रिय लिगसम्म ल्याउँछु भन्ने दृढ विश्वास थियो ।

“कर्णालीलाई प्रतियोगिताअघि कसैले पनि राष्ट्रिय लिगमा छनोट हुने टिमको रूपमा लिएका थिएनन्,” सिर्जना भन्छिन्, “तर, मलाई कर्णालीबाट खेल्न बोलाउँदा भने जसरी हुन्छ टिमलाई राष्ट्रिय लिगसम्म ल्याउँछु भन्ने मानसिकता बनाएकी थिए । टिम व्यवस्थापन राम्रो हुन नसके पनि खेलाडीले इख लिएर खेले ।”

प्रतियोगितामा मधेसलाई पछि पारेको कर्णालीले ६ खेल खेल्दा १२ अंक जोड्यो । प्रतियोगितामा मधेसविरुद्ध १–० को जित निकाल्नु कर्णालीको सनसनीपूर्ण नतिजा थियो । 

कर्णालीको नजिता 
प्रतियोगिताका ६ खेलमध्ये चार खेलमा जित र दुई खेलमा हारको नतिजासहित १२ अंक जोड्दै कर्णालीले तेस्रो स्थान हासिल गरेको हो । पहिलो खेलमा कोसी प्रदेशविरुद्ध ३–० को हार व्यहोरे पनि दोस्रो खेलमा मधेसविरुद्ध १–० को जित निकाल्दै कर्णालीले प्रतियोगितामा सनसनी मच्चायो । तेस्रो खेलमा वाग्मतीविरुद्ध ३–२ को र चौथो खेलमा लुम्बिनीविरुद्ध ४–१ को जित निकालेको कर्णालीले पाँचौँ खेलमा भने सुदूरपश्चिम प्रदेशविरुद्ध १–० को हार बेहोर्न पुग्यो । अन्तिम खेलमा गण्डकीविरुद्ध २–० को जित निकालेसँगै कर्णालीले पहिलोपटक राष्ट्रिय लिगसम्मको यात्रा निश्चित गरेको थियो । 

“यो कर्णाली प्रदेशको इतिहासमै महिला फुटबलको सबैभन्दा ठूलो उपलब्धि हो । कर्णालीका चेलीहरूले नाम राखे । यो सबै उपलब्धिको श्रेय उनीहरूलाई नै जान्छ  । हाम्रो कर्णालीका चेलीहरू पनि कमजोर छैनन् भन्ने सन्देश दिएका छन्,” छनोटको अन्तिम खेलमा गण्डकीविरुद्धको जितपछि कर्णालीका प्रशिक्षक दिलीप थापाले भने ।

राष्ट्रिय लिगमा छनोट हुँदा थापा जति खुसी छन्, त्यति नै गम्भीर पनि छन् । लिगमा तीन बलिया विभागीय टिमविरुद्ध खेल्न कर्णालीको यो टोलीले नभ्याउने बुझेका थापा अहिलेदेखि नै प्रदेश र जिल्ला फुटबल संघले खेलाडीहरूलाई बन्द प्रशिक्षणमा राख्नुपर्नेमा जोड दिन्छन् । 

यो लयलाई कायम राख्न अब प्रदेश र जिल्ला फुटबल संघहरूले ग्रासरुट प्रशिक्षणमा तत्कालैदेखि जोड दिनुपर्छ,” प्रशिक्षक थापा थप्छन्, “राष्ट्रिय लिगमा यो टिमले पुग्दैन । टिम फर्मेसन मिलाउन एक महिलाअघि नै बन्द प्रशिक्षणमा राख्नुपर्छ । अब टिमलाई अझ बलियो बनाएर लैजानु पर्छ ।”

पहिलेको जस्तो नहोस् 
कर्णालीकी कप्तान सिर्जनाले यसअघि २०७८ चैतमा भएको राष्ट्रिय महिला लिगमा ललितपुरको कप्तानी सम्हालेकी थिइन् । तर, उक्त लिग पूरा हुन भने पाएन । 

लिगको पहिलो चरण चितवनको शारदानगरमा चैत १० देखि ३० गतेसम्म भएको थियो । पहिलो चरणको १५ दिनपछि विराटनगरमा दोस्रो चरण गर्ने भनिए पनि अखिल नेपाल फुटबल संघ (एन्फा)ले एक वर्षसम्म त्यसलाई पूर्णता दिन सकेन । अन्ततः २०७९ को फागुनमा एन्फाले उक्त लिग समाप्त भएको घोषणा गर्‍यो । पहिलो चरणको अंक तालिकाबाट नै विजेता, दोस्रो र तेस्रो टोली चुनेको एन्फाले त्यसको एक वर्षपछि महिला लिगका निम्ति छनोटको आयोजना गरेको हो । 

सिर्जनाले दुई वर्षअघि लिग खेल्दाको पारिश्रमिक र एन्फाबाट घोषित पुरस्कार अझैसम्म पाएकी छैनन् । उनी २०७८ को राष्ट्रिय लिग छनोटमा उत्कृष्ट रक्षक चुनिएकी थिइन् । पुरस्कारका निम्ति एन्फा धाउँदा–धाउँदै वाक्क बनिसकेकी सिर्जनाले अब आउँछ भन्ने आश पनि छोडिसकिन् । उनको चाहना अब आउने लिग पनि पहिलेजस्तै नहोस् भन्नेमात्रै छ ।

“क्लबले पारिश्रमिक र एन्फाले घोषणा गरेको पुरस्कार नै अहिलेसम्म दिएको छैन । निवेदन, इमेल, छलफल सबै गरेर थाकिसके,” सिर्जना भन्छिन्, “अब आउँछ भन्ने आश नै छैन । तर, अब हुन लागेको महिला लिगमा पनि त्यस्तो नहोस् भन्ने कामना गरेको छुँ ।”