काठमाडौं । सम्पत्ति शुद्धीकरण मुद्दामा मनिष भनिने दुर्गासिंह तामाङ दोषी ठहर भएका छन् । विशेष अदालतका न्यायाधीशहरू अध्यक्ष टेकनारायण कुँवर र सदस्य मुरारीबाबु श्रेष्ठको इजलासले सोमबार तामाङलाई दोषी ठहर गरेको हो ।

लागुऔषध मुद्दामा काठमाडौं जिल्ला अदालतबाट १० वर्ष कैद र एक लाख रुपैयाँ जरिवानाको सजाय पाएका तामाङविरुद्ध अवैध आम्दानी भएको देखिएको दाबीसहित सम्पत्ति शुद्धीकरण अनुसन्धान विभागले वैशाख २ गते विशेष अदालतमा मुद्दा दायर गरेको थियो ।

अदालतबाट उनले २७ लाख १७ हजार रुपैयाँ बराबरको अवैध आम्दानी गरेको ठहर भएको छ ।

अदालतले तामाङबाट ५४ लाख ३४ हजार जरिवाना असुल्न भनेको छ । उनलाई लागुऔषधबाहेक थप ६ वर्ष कैद सजाय हुने पनि फैसला भएको छ ।