काठमाडौं । अर्थमन्त्री वर्षमान पुनले जनतामा आशा जगाउने गरी आगामी आर्थिक बर्षको बजेट ल्याउने तयारी भइरहेको बताएका छन् । 

नेपाल आर्थिक पत्रकार समाज सेजनले बिहीबार काठमाडौंमा आयोजना गरेको प्रि–बजेट छलफलमा अर्थमन्त्री पुनले निजी क्षेत्रको मनोबल बढाउने र जनतामा पनि आशा जगाउने गरी बजेट ल्याउने तयारी भइरहेको बताए ।

बजेटलाई परिणाममुखी बनाउनका लागि प्राय सबै क्षेत्रसँग छलफल गरिरहेको उनले बताए । गत वर्षभन्दा मुलुकको अर्थतन्त्र केही राम्रो भएपछि थप राम्रो बनाउनका लागि आशावादी ढंगले नै बजेट निर्माण भइरहेको धारणा राखे ।

"निजी क्षेत्रको मनोबल घटेकोमा उठाउने कुरालाई प्राथमिकता दिने, सम्पत्ति र व्यवसायको सुरक्षालाई सरकारबाट विश्वास दिलाउन प्रतिवद्ध छौँ," उनले भने । सरकारको नीतिबाट बाहिर राष्ट्र बैंक नहुने भन्दै नीति तथा कार्यक्रम, बजेट र मौद्रिक नीतिमा एकरुपता ल्याउने बताए ।

विद्युतीय सवारी साधनमा कर बढाउन दबाब आइरहेको र ईभीका कारण ४० अर्ब गुमे पनि यसबारे अध्ययन गरेर देशका हितमा आवश्यक निर्णय गर्ने जानकारी दिए ।