काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले विदेशीको दबाब र प्रभावका कारण मुलुकको सत्तासमीकरण परिवर्तन भएको जिकिर गरेका छन् ।

राष्ट्रिय प्रजातान्त्रिक महिला संगठनले आइतबार काठमाडौंमा आयोजना गरेको कार्यक्रममा उनले नेपालका राजनीतिक दलहरू विदेशीको इसारामा चल्ने गरेको आरोप लगाए । सत्तासमीकरण परिवर्तन पनि विदेशीको दबाब र प्रभावका कारण भएको उनको भनाइ थियो ।

अहिले दलहरूको प्राथमिकतामा सत्ता मात्र रहेको उनले टिप्पणी गरे । निर्वाचनमा गठबन्धन गर्ने विषयमा पनि विदेशीको दबाब आउने गरेको उनले बताए ।

मिलीजुली बाँकी रहेको देश लुट्ने र त्यसका निम्ति सत्तालाई प्रयोग गर्ने गरिएको भन्दै उनले यस्तो अवस्थाबाट देशलाई मुक्त गर्न राप्रपाले नेतृत्वदायी भूमिका निर्वाह गर्ने जिकिर गरे । उनले राजनीति गर्ने मान्छे आर्थिक रूपमा इमानदार हुनुपर्नेमा जोड दिए । हिमालयन टेली भ्वाइस