काठमाडौं । चिकित्सक संघहरूले सिनामंगलस्थित काठमाडौं मेडिकल कलेजको शिक्षण अस्पतालमा सोमबार भएको घटनाका दोषीलाई कारबाही गर्न माग गरेका छन् ।

नेपाल चिकित्सक संघ र प्राथमिक चिकित्सक तथा आकस्मिक चिकित्सा संघ नेपालले छुट्टाछुट्टै मंगलबार विज्ञप्ति जारी गरेर घटनामा संलग्नलाई छानबिन गरी कारबाही गर्न माग गरेका हुन् ।

ड्युटीमा रहेका चिकित्सकमाथि हातपात हुनुले देशको शान्ति सुरक्षामाथि नै प्रश्न उठाएको भन्दै उनीहरूले घटनाको भर्त्सना गरेका छन् । 

घटनाबारे तत्काल छानबिन गरी स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन २०६६, पहिलो संशोधनअनुसार कारबाही हुनुपर्ने चिकित्सक संघको माग छ ।

अस्पतालमा उपचारका निम्ति ल्याइएका ६२ वर्षीय एक पुरुषको उपचारका क्रममा मृत्यु भएपछि आफन्तले ड्यूटीमा रहेका दुई चिकित्सकमाथि आक्रमण तथा अस्पतालमा तोडफोड गरेका थिए ।

आक्रमणका क्रममा इमर्जेन्सीमा कार्यरत चिकित्सकहरू डा. विनिता प्रधान र प्रजा साह सामान्य घाइते भएका थिए ।

मृतकका आफन्तले उपचारका क्रममा अस्पतालका तर्फबाट लापरबाही भएको आरोप लगाउँदै इमर्जेन्सी काउन्टरमा तोडफोड गरेका थिए । घटनापछि सोमबार राति अबेरसम्म वार्ताको प्रयास भए पनि सहमति नभएको अस्पताल प्रशासनले जनाएको छ ।