काठमाडौं । राष्ट्रिय ध्वजावाहक नेपाल वायुसेवा निगमको ‘न्यारोबडी’ ग्राउन्डेड भएको पाँच महिनापछि नियमित उडानमा आएको छ । निगमको कलसाइन नम्बर ‘नाइन एन–एकेएक्स’ लुम्बिनी जहाज आज (सोमबार) इजरायलबाट नेपाल ल्याइँदै छ । 

यो जहाज पछिल्लो पटक नोभेम्बर ३० मा त्रिभुवन अन्तर्राष्ट्रिय विमानस्थलमा ग्राउन्डेड भएको थियो । उक्त जहाज मर्मतका लागि निगमले इजरायलको इजरायल एयरस्पेस इन्डष्ट्रिज (आईएआई)सँग सम्झौता गरेको छ । जनवरी १२ मा जहाज इजरायलस्थित आईएआई पठाइएको थियो । जहाज इजरायल पठाएको १०० दिनपछि उडानमा फर्किएको हो । “जहाज आज राति इजरायलबाट नेपाल आउँदै छ । इजरायलबाट दुबई हुँदै त्यहाँबाट नियमित उडानमा यात्रु बोकेर नेपाल आउनेछ,” निगमका प्राविधिक प्रवक्ता देवेन्द्र पुनले भने । 

उक्त कम्पनीले ९० दिनमा इन्जिन मर्मत गरिदिने सम्झौता गरेको थियो तर, केही ढिलाइ गरेको हो ।

निगमको न्यारोबडी ‘नाइन एन–एकेएक्स ३२० लुम्बिनी’ जहाज सुरुमा २०८० असार ३१ गते अर्थात् जुलाई १६, २०२३ मा ग्राउन्डेड भएको थियो । जुलाई १६ मा ग्राउन्डेड जहाज सेप्टेम्बर २८ बाट भाडाको इन्जिन प्रयोग गर्दै नियमित उडानमा आएको थियो । त्यतिबेला उक्त जहाज ६१ दिन ‘ग्राउन्डेड’ भएको थियो । बिग्रेको इन्जिन मर्मतको लागि इजरायलमै छोडेर भाडाको इन्जिन लिएर जहाज उडानमा ल्याइएको थियो । इजरायलमा जुलाई १६ मा छोडेको इन्जिन मर्मत भएको हो । 

उक्त जहाज पुनः नोभेम्बर ३० मा त्रिभुवन अन्तर्राष्ट्रिय विमानस्थलमा ग्राउन्डेड भयो ।  नोभेम्बर ३० मा बिग्रेको इन्जिन भने अझै मर्मत भएको छैन । त्यसको ठाउँमा भाडाको इन्जिन प्रयोग गरिएको छ भने इन्जिन कहिलेसम्म मर्मत हुन्छ भन्ने कुरा यकिन नभएको निगमका एक कर्मचारीले बताउँछन् ।  

निगमले एउटा न्यारोबडीबाट दैनिक एक करोड १५ लाख रुपैयाँ आम्दानी गर्छ । यो रकम निगमले आफैँले सार्वजनिक गरेको तथ्यांक हो । जहाजको इन्जिन समयमा मर्मत नहुँदा निगमले करोडौँ रुपैयाँ गुमाइसकेको छ ।

‘ग्राउन्डेड’ जहाजमा प्रयोग भएको भाडाको इन्जिनका लागि प्रतिदिन दुई हजार अमेरिकी डलर खर्च गर्दै आइरहेको छ । नियमित उडान हुन नसक्दा निगमले एकातर्फ दैनिक करोडमाथिको आम्दानी गुमाइरहेको छ । भने अर्कोतर्फ बजार हिस्सा समेत गुमाउँदै आएको छ । निगमको बजार हिस्सा २५ प्रतिशतबाट घटेर १४ प्रतिशतमा झरिसकेको छ ।