काठमाडौं । सरकारले राष्ट्रपति महिला उत्थान कार्यक्रमअन्तर्गत हालसम्म ६७८ गर्भवती तथा सुत्केरीको निःशुल्क हवाई उद्धार गरेको छ । आर्थिक वर्ष २०७५/०७६ देखि हालसम्म सो संख्यामा दुर्गम क्षेत्रमा ज्यान जोखिममा परेका गर्भवती तथा सुत्केरीको उद्धार गरिएको हो ।

चालु आर्थिक वर्षमा भने वैशाख पहिलो सातासम्म १२६ जनाको उद्धार गरिएको महिला, बालबालिका तथा ज्येष्ठ नागरिक मन्त्रालयअन्तर्गत राष्ट्रपति महिला उत्थान समन्वय इकाइकी प्रमुख नीता शर्माले जानकारी दिइन् ।

कार्यक्रमअन्तर्गत सरकारले सम्बन्धित जिल्ला प्रशासन कार्यालयको पहलमा निःशुल्क उद्धार गर्दै आएको छ । इकाइकी प्रमुख शर्माका अनुसार, गर्भवती तथा सुत्केरीमा स्थानीय प्रसूति सेवा लिने क्रममा जटिलता देखिए, जनशक्ति, उपकरण वा सडक यातायातका कारण जिल्ला अस्पतालसम्म पुर्‍याउने अवस्था नभए उनीहरूको उद्धार गरिन्छ ।

यो कार्यक्रम हाल १९ जिल्लामा पूर्ण र २९ मा आंशिक गरी ४८ जिल्लामा लागु छ । यो कार्यक्रम दुर्गम क्षेत्रमा ज्यान जोखिममा परेका गर्भवती तथा सुत्केरी महिलाका निम्ति हवाई उद्धारसम्बन्धी कार्यविधि–२०७७ अनुसार सञ्चालित छ ।

इकाइले पीडितलाई तत्काल उद्धार गर्नका निम्ति ९८५१२५५२५४ को निःशुल्क हटलाइन सेवा पनि उपलब्ध गराएको छ । सोही हटलाइनमा सम्बन्धित जिल्ला प्रशासन कार्यालयबाट जानकारी आएपछि पीडितलाई तत्काल उद्धार गरिने शर्माले बताइन् ।

सो सेवा लिएकालाई सरकारले यातायात खर्चबापत प्रतिव्यक्ति २० हजार रुपैयाँ पनि उपलब्ध गराउँदै आएको छ ।