हङकङ । हङकङको फुड सेफ्टी विभागले भारतीय कम्पनी एमडीएच र एभरेस्टका केही बन्द प्याकेटभित्रका मसलामा कीटनाशक एथिलिन अक्साइड पाइएको जनाउँदै त्यो प्रयोग नगर्न सुझाव दिएको छ । सो मसलाको खरिद–बिक्रीमा पनि रोक लगाइएको छ ।

सिंगापुरमा पनि एभरेस्टको फिसकरी मसलालाई बजारबाट फिर्ता गर्न निर्देशन दिइएको छ । हङकङको फुड सेफ्टी विभाग सेन्टर फर फुड सेफ्टीले एमडीएचको मद्रास करी पाउडर, साम्भर मसला मिक्स्ड पाउडर र करी पाउडर मिक्स्ड मसलामा कीटनाशक औषधि एथिलिन अक्साइड पाइएको भन्दै त्यो प्रयोग नगर्न सर्वसाधारणलाई आग्रह गरेको छ ।

सेन्टर फर फुड सेफ्टीले यसको बिक्री रोक्नुको कारण खुलाउँदै क्यान्सरका बारेमा अनुसन्धान गर्ने एजेन्सीले एथिलिन अक्साइडलाई ग्रुप १ कार्सिनोजेनमा राखेको जनाएको छ । कार्सिनोजेन यस्तो पदार्थ हो, जसबाट क्यान्सर हुने खतरा हुन्छ ।

फुड सेफ्टी विभागले खाद्यपदार्थमा कीटनाशक अवशेष नियमको हवाला दिँदै जनस्वास्थ्यलाई प्रतिकूल असर नगर्ने खाद्यान्न मात्र बेच्न अनुमति दिन सकिने जनाएको छ ।

हङकङको फुड सेफ्टी विभागले तीन रिटेल पसलबाट मसलाका नमुना लिएको थियो । सो विभागका प्रवक्ताका अनुसार, खाद्यपदार्थमा एथिलिन अक्साइडजस्तो कीटनाशक औषधि प्रयोग गर्नेमाथि अधिकतम ५० हजार डलरको जरिवाना हुनसक्छ । अपराध प्रमाणित भएमा जरिवानाका अतिरिक्त ६ महिना जेल सजायको समेत व्यवस्था छ ।

सिंगापुरको फुड एजेन्सीले लामो समयसम्म यसप्रकारको प्रयोगले स्वास्थ्यमा खतरा उत्पन्न हुन सक्ने जनाएको छ । एभरेस्टले भने भारत सरकारले आवश्यक जाँच गरेर नै सो कम्पनीका उत्पादन बजारमा गएको जनाएको छ ।

भारतीय मसलाका बारेमा यसअघि अमेरिकामा पनि प्रश्न उठाइएको थियो । सन् २०२३ मा अमेरिकी फुड एन्ड अथोरिटीले एभरेस्टको साम्भार मसला र गर्म मसलालाई बजारबाट फिर्ता लिन निर्देशन दिएको थियो । सो मसलामा साल्मोनेला पोजिटिभ देखिएको थियो । जसले पखाला लाग्ने, पेट दुख्ने, ज्वरो आउने, चक्कर लाग्नेजस्ता समस्या हुने जनाइएको थियो । बीबीसी हिन्दीबाट ।