काठमाडौं । सिटिजन्स बैंक इन्टरनेशनल लिमिटेडको नाफा घटेको छ । बैंकले शुक्रबार सार्वजनिक गरेको चैत मसान्तसम्मको अपरिष्कृत वित्तीय विवरणअनुसार नाफा १.९९ प्रतिशतले घटेको हो ।

बैंकले चैत मसान्तसम्म एक अर्ब २१ करोड १४ लाख रुपैयाँ नाफा गरेको छ । गत वर्षको चैत मसान्तसम्म एक अर्ब २३ करोड ६० लाख रुपैयाँ नाफा आर्जन गरेको थियो ।

चैत मसान्तसम्म बैंकले गत वर्षको सोही अवधिको तुलनामा खराब कर्जा घटाएको छ । गत वर्षको चैत मसान्तसम्म बैंकको खराब कर्जा ३.९८ प्रतिशत थियो । यो वर्षको सोही अवधिमा घटाएर ३.७६ प्रतिशत कायम गरेको छ ।

बैंकले चैत मसान्तसम्म चार अर्ब २५ करोड ६० लाख रुपैयाँ खुद ब्याज आम्दानी गरेको छ । गत वर्षको सोही अवधिमा चार अर्ब ३९ करोड ९१ लाख रुपैयाँ खुद ब्याज आम्दानी गरेको थियो ।

चैत मसान्तसम्म गत वर्षको तुलनामा बैंकबाट जाने ऋण बढेको छ । चैतसम्म बैंकले एक खर्ब ५२ अर्ब ५६ करोड ९९ लाख रुपैयाँ ऋण प्रवह गरेको छ । गत वर्षको सोही अवधिमा एक खर्ब ३९ अर्ब ८३ करोड २० लाख रुपैयाँ ऋण प्रवाह गरेको थियो ।

त्यसैगरी निक्षेप संकलन पनि बढेको छ । चैत मसान्तसम्म एक खर्ब ८२ अर्ब ५० करोड ४९ लाख रुपैयाँ निक्षेप संकलन गरेको छ । गत वर्षको सोही अवधिमा एक खर्ब ६८ अर्ब ८४ करोड २१ लाख रुपैयाँ निक्षेप संकलन गरेको थियो ।

बैंकको वितरणयोग्य मुनाफा भने ऋणत्मक छ ।