लण्डन । बेलायती राजकुमार ह्यारीले आफ्नो एक औपचारिक कागजातमा बेलायतसँगको सम्बन्ध देखाउन चाहेनन् ।
सो कागजातको रेकर्डले उनी चाँडै बेलायत फर्कन नचाहेको जस्तो देखिएको छ । उनी चार वर्षदेखि बेलायत छोडेर अमेरिका बस्दै आएका छन् । उनी अहिले अमेरिकाको क्यालिफोर्नियामा पत्नी मेघन मर्केल, राजकुमार आर्ची र राजकुमारी लिलिबेटसँग बस्दै आएका छन् ।
गतवर्ष बेलायतमा उनीहरु बस्दै आएको फ्रगमोर कटेज छोड्न लगाइएको थियो त्यसले गर्दा उनीहरुको बेलायतमा रहेको स्थायी बसोबासस्थल टुटेको थियो । अहिले पछिल्लो पटक उनले आफ्नो बसोबास गरेको देशको नाम बेलायतबाट अमेरिका सारेको पाइएको छ ।
ह्यारीले गैरनाफामुलक इको टुरिजम सम्बन्धी कम्पनी ट्राभालिस्ट सम्बन्धी एक सूचनामा सो कुरा उल्लेख गरेका छन् । सो कम्पनी उनले नै स्थापना गरेका हुन् । उनको परियोजना जब ४ वर्ष अघि सेट अप भयो ह्यारीले कम्पनी रहेको घर बेलायतमा रहेको उल्लेख थियो ।
तर, दुई दिनअघि फाइल गरिएको सूचनामा उनको वासस्थान अमेरिका भनिएको छ । उनले सो कम्पनीको कार्यक्रमलाई बुधबार भिडियो मार्फत सम्बोधन गरेका थिए । यो परिवर्तनको मिति भने व्याक डेटमा सन् २०२३को जुन २९ लेखिएको छ ।
त्यो तिथि उनीहरुको बेलायतस्थित निवास फ्रोगमोर कटेजको चाबी बुझाउनु अघिको हो । गएको मार्च महिनामा बेलायतका राजा चाल्र्सले सो प्रपर्टी खाली गर्न आग्रह गरेको कुरा सार्वजनिक भएको थियो । जुन तत्कालीन रानीले ह्यारीको विवाह भएपछि उनीहरुलाई उपहार दिएकी थिइन् । (मिरर)
