काठमाडौं । राष्ट्रियसभा अध्यक्ष नारायणप्रसाद दाहालले संविधान बनेको आठ वर्षसम्म आवश्यक ऐन कानुन बन्न नसक्नु दुःखद भएको बताएका छन् । राष्ट्रिय राजनीतिमा हुने उत्तारचढावका कारण महत्त्वपूर्ण ऐन कानुनहरू समयमा नै बन्न नसकेको उनको भनाइ छ । 

मंगलबार सिंहदरबारमा संसदीय मामिलासम्बन्धी रिपोर्टिङ गर्ने पत्रकारहरूसँगको छलफलका क्रममा दाहालले अन्य व्यक्तिगत कारण नभई राष्ट्रिय राजनीतिमा देखा परेको अहिलेको अवस्थाका कारण संविधानप्रदत्त कानुन बन्न नसकेको जानकारी दिए । “नेपालमा कानुनी झन्झट छ भनेर विदेशबाट आएकाहरूले पनि भन्छन् । अलिअलि जटिलता पनि छ,” उनले भने । 

अध्यक्ष दाहालले आफू पदमा रहुन्जेल पदको गरिमा र राष्ट्रियसभाको गरिमा कायम गराउन सधैँ लागि पर्ने प्रतिबद्धता व्यक्त गरे । उनले राष्ट्रियसभाको गरिमा बढाउने र कामकाजी बनाउने काम आफू र अन्य ५८ सदस्यको मात्र नभएर सबै सरोकारवाला पक्षहरूको भएको भनाइ उनको थियो । 

अध्यक्ष दाहालले राष्ट्रियसभाले भनेजति काम नगरे पनि आफू असन्तुष्टै भइनसकेको जिकिर गरे । उनले सञ्चार माध्यममा पनि सभाले गरेका काम कारबाहीको कभरेज कम भएकोमा गुनासो गरे । “अन्य माननीयज्यूले पनि गुनासो गर्ने गर्नुभएको छ । मिडियामार्फत हाम्रा गतिविधिहरू गइदिए हुन्थ्यो भन्ने अपेक्षा सबैको छ,” उनले भने । 

राष्ट्रियसभाले आफूले आफूलाई चिनाउन आफैँ सुदृढ हुन जरुरी रहेकाले यसतर्फ ध्यान दिनुपर्ने भन्दै उनले आफ्नो कार्यकालमा अधिकतम राम्रो गर्ने प्रयास गर्ने र नराम्रो गर्‍यो भन्ने अवस्था आउन नदिने जिकिर गरे । 

त्यस्तै, उनले राष्ट्रियसभा सदस्यहरूलाई विज्ञ, ज्ञाता बनाउन निरन्तर छलफल गर्ने र राष्ट्रियसभालाई प्रभावकारी बनाउँदै लैजाने प्रतिबद्धता जनाए । “कति राम्रो गर्न सक्छु थाहा छैन । तर, नराम्रो गरेर चाहिँ म बाहिर जान्न,” उनले भने ।