काठमाडौं । लक्ष्मी सन्‌राइज बैंकले आर्थिक वर्ष २०७९/८० सम्मको सवारी साधन कर्जा तथा आवासीय कर्जाअन्तर्गत निष्कासित कार्बन उत्सर्जन प्रतिवेदन सार्वजनिक गरेको छ ।

बैंक कार्बन एकाउन्टिङ फाइनान्सियल पार्टनरसिप (पीसीएएफ) सँग २०२१ देखी आबद्व हुँदै आएको छ ।

पीसीएएफ वित्तीय संस्थाहरूको विश्वयापी साझेदारी समूह हो । जसले वित्तीय संस्थाहरूको कर्जा र लगानीका क्षेत्रहरूमार्फत उत्सर्जन हुने ग्रिन हाउस ग्यास (जीएचजी) को मूल्यांकन र सोको विवरणहरू संकलन र सार्वजनिक गर्ने काम गर्छ ।

लक्ष्मी सन्‌राइजको प्रकाशित भएको विवरणले बैंकको सवारी साधन कर्जा र आवासीय कर्जामार्फत गत आर्थिक वर्षसम्म (१६ जुलाई २०२३ सम्म) कुल १५ हजार ९६५.११ टन कार्बन डाइअक्साइड इक्विभ्यालेन्ट उत्सर्जन गरेको देखाएको छ । जसमध्ये सवारी साधन कर्जामार्फत तीन हजार ६४४.५१ टीसीओई र आवासीय कर्जामार्फत १२ हजार ३२०.६० टीसीओई कार्बन उत्सर्जन भएको छ ।

बैंकले आफ्नो कार्बन फुटप्रिन्टको पहिचानसँगै उत्सर्जन गरेको टीसीओईको असरलाई न्यूनीकरण गर्न पहल अगाडि बढाइसकेको छ । विभिन्न हरित परियोजनामा लगानी बढाउनुका साथै आफ्ना डिजिटल प्लेटफर्मको पहुँचलाई अझ सुगम र सुढृद बनाउने, पूर्ण/रूपमा डिजिटल बचत खाताहरूको सञ्चालन गर्ने र आफ्ना ग्राहकहरूलाई दिगो अभ्यासहरू गर्न प्रेरित गर्नेलगायतका कार्यहरू गर्दै आएको छ ।