काठमाडौं । जाभी अलोन्सोको प्रशिक्षणमा रहेको बायर लेभरकुजेन १२० वर्षको इतिहासमा जर्मन बुन्डेसलिगाको नयाँ च्याम्पियन बनेको छ ।
सोमबार घरेलु मैदानमा ५० हजारभन्दा बढी समर्थकमाझ लेभरकुसनले वार्डेर ब्रेमनलाई ५–० ले हराउदै क्लबको इतिहासमै पहिलोपटक लिगको उपाधि जितेको हो । घरेलु टिमको जितमा फोरिअन विर्टजले ह्याट्रिक गरे । ग्रानित जाका र भिक्टोर बोनिफेसले समान एक गोल थपे ।
जारी सिजन घरेलु लिगमा अपराजित लेभरकुसन पाँच खेलअगावै च्याम्पियन बनेको हो । लिगमा २९ मध्ये २५ खेलमा जित र चार बराबर खेल्दा लेभरकुजेनले ७९ अंक जोडेको छ । दोस्रो स्थानको बायर्न म्युनिखको भन्दा यो १६ अंक धेरै हो । २९ खेल खेल्दा बायर्नको ६३ अंक छ । बायर्न म्युखिनले विगत ११ सिजन लगातार उपाधि जितेको थियो ।
पहिलोपटक लिग च्याम्पियन बनेको लेभरकुसन समग्रमा बुन्डेसलिगाको उपाधि जित्ने १३औँ क्लब बनेको छ । सन् २००८–२००९ मा उल्फस्बर्गले जितेपछि बुन्डेसलिगाले नयाँ च्याम्पियन पाएको हो ।
