विराटनगर । कोसी प्रदेशमा सरकार गठनको प्रयास थालेका नेकपा (एमाले) र नेकपा (माओवादी केन्द्र)ले सदनमा संकल्प प्रस्ताव लिएर जाने तयारी गरेका छन् । कोसीमा १६ महिनामा छैटौँपटक सरकार गठनको प्रयास सुरु गरिएको हो ।

दुवै दलले मंगलबार विराटनगरमा संयुक्त पत्रकार सम्मेलन गरी मुख्यमन्त्री केदार कार्की स्वतः अल्पमतमा परेको जिकिर गरेका छन् । एमाले र माओवादीका ५२ सांसदले सोमबार प्रदेश प्रमुखसमक्ष समावेदन गरी कार्की नेतृत्वको सरकारलाई दिएको समर्थन फिर्ता लिएका थिए ।

कोसी प्रदेशसभामा एमालेका प्रमुख सचेतक रहेका रेवतीरमण भण्डारीले मुख्यमन्त्रीले सहज निकास दिनुपर्ने बताए । उनले भने, “मध्यावधि निर्वाचनको धम्की मान्य छैन । अब प्रदेशसभाको विशेष अधिवेशनमार्फत संकल्प प्रस्ताव  लैजान्छौँ, त्यहाँ सरकार बहुमतमा रहे/नरहेको प्रस्ट हुनेछ ।”

माओवादी सांसद दुर्गाप्रसाद चापागाईंले कोसी सरकार अल्पमतमा परिसकेको बताए ।

एमाले सांसद लीलावल्लभ अधिकारीले केन्द्रीय समीकरण परिवर्तन भएसँगै प्रदेशहरूमा सत्ताको नेतृत्व फेरिनु स्वाभाविक भएको बताए । उनले भने, “संविधानको धारा १८७ को उपधारा २ मा संसदीय सर्वोच्चताको कुरा छ, त्यहीअनुसार हामीले पहिले पत्र दर्ता गरेकोले विशेष अधिवेशन आह्वान हुन्छ ।”

१५ दिनभित्र प्रदेशसभाको विशेष अधिवेशन आह्वान गरिने उनले दाबी गरे । नेपालको संविधानको धारा १८८ को उपधारा २ बमोजिम अब मुख्यमन्त्रीले विश्वासको मत लिनैपर्ने र वैशाख २६ गते सरकार पदमुक्त हुने उनको भनाइ छ ।