काठमाडौं । नेपाली कांग्रेसका महामन्त्री विश्वप्रकाश शर्माले गृहमन्त्री रवि लामिछानेलाई बहसका लागि संसदीय समितिको कार्यालयमा आउन निम्तो दिएका छन् । बुधबारको प्रतिनिधिसभा बैठकमा उनले गृृहमन्त्रीले आफूमाथि लागेको आरोपबारे सार्वजनिक बहस गर्न तयार भएको भन्दै दिएको अभिव्यक्तिबारे समितिमा बहस गर्न आग्रह गरे ।
“माननीय गृहमन्त्रीजीमा उत्साह छ । उर्जा छ, बोल्दै गर्दा हामीभन्दा ठूलै स्वरमा बोल्न सक्नुहुन्छ । आउनुस् बहस गर्नका लागि ठाउँ निर्धारित गर्न चाहन्छु । नेपालको प्रमुख प्रशासनिक केन्द्र सिंहदरबारभित्र स्थापना हुने संसदीय छानबिन समितिको कार्यालयमा उहाँलाई निमन्त्रण गर्न चाहन्छु,” उनले भने ।
उनले गृहमन्त्रीको जवाफ मिडियाबाट सुनिएको भन्दै अब संसदीय छानबिन समितिमा जवाफ दिन पाउनुपर्ने बताए । उनले गृहमन्त्रीको सहजताका लागि नै संसदीय समितिको माग गरेको बताए ।
