काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको बन्दीप्रत्यक्षीकरण रिटमाथि आज (वैशाख ९)लाई पेसी तोकिएको छ । सर्वोच्च अदालतमा हिजो पनि यो रिटको पेसी तोकिएकामा ‘हेर्न नमिल्ने’मा परेको थियो ।

लामिछानेका तर्फबाट उनकी श्रीमती निकिता पौडेलले गएको आइतबार (वैशाख ७) बन्दी प्रत्यक्षीकरणको रिट दर्ता गराएकी थिइन् । त्यसपछि सोमबार न्यायाधीश हरि फुयालको इजलासमा यो रिट ‘हेर्न नमिल्ने’मा परेको हो ।

बुटवलको सुप्रिम सहकारी ठगी तथा संगठित अपराधमा उच्च अदालत तुलसीपुर, बुटवल इजलासको आदेशमा पुर्पक्षका निम्ति थुनामा रहेका लामिछाने यसअघि ७३ नम्बर निवेदन लिएर सर्वोच्च गएका थिए । उनको उक्त निवेदनमा सर्वोच्चका न्यायाधीश टेकप्रसाद ढुंगानाको इजलासले कैफियत प्रतिवेदन झिकाउने आदेश गरेको छ ।

उक्त आदेशपछिको सुनवाइ नहुँदै उनका तर्फबाट श्रीमती निकिताले बन्दीप्रत्यक्षीकरणको रिट दायर गरेकी हुन् । लामिछानेलाई गैरन्यायिक थुनामा राखिएको भन्दै रिहा गर्न रिटमा माग गरिएको छ ।