काठमाडौं । नेकपा (एमाले)का नेता रघुजी पन्तले वैशाख १५ गते हुने उपनिर्वाचनमा एमालेलाई नेकपा (माओवादी केन्द्र)ले समर्थन गर्ने विश्वास व्यक्त गरेका छन् । मंगलबार संसद् भवनमा सञ्चारकर्मीसँग कुरा गर्दै पन्तले उपनिर्वाचनबारे माओवादीसँग छलफल भइरहेको पनि जानकारी दिए ।

यसअघि पनि इलाममा एमालेले निरन्तर जितेको र यसपटक पनि सम्भावना भएका व्यक्तिलाई उमेदवार बनाएको उनको भनाइ छ । पन्तले अहिलको सहयात्रालाई बलियो बनाउन पनि माओवादीले समर्थन गर्ने भन्दै त्यसो हुन नसके एक्लै चुनाव लड्ने र जित्ने दाबी गरे ।

एमालेले पहिचानका नाममा राष्ट्रिय एकता कमजोर बनाउने काम नगर्ने उनले बताए ।

त्यस्तै, पन्तले गृहमन्त्रीविरुद्ध छानबिनका लागि कांग्रेसले माग गरेको संसदीय समिति गठनको मागप्रति पुनर्विचार गर्ने बताए ।

सदनमा कुनै बिषयको उठान गरेपछि टुंगा लगाउनुपर्ने दायित्व सोही दलकै रहेको भन्दै उनले अहिले कांग्रेसलाई संसदीय छानबिन समितिको बिषयलाई छाड्न कठिन भएको तर्क गरे ।

उनले अहिलेको अवस्थामा संसदीय छानबिन समिति गठन हुन सक्ने नदेखिएको धारणा राखे ।