काठमाडौं । सरकारले रोजगारीका निम्ति आज (सोमबार) दोस्रो चरणमा नर्स बेलायतमा पठाउँदै छ । आज राति १० नर्स बेलायत उड्न लागेको वैदेशिक रोजगार विभागका जीटूजी शाखा निर्देशक गिरीराज ज्ञवालीले जानकारी दिए । 

जीटूजी प्रक्रियाबाट पहिलो चरणमा बेलायत जान ४२ नर्स छनोट भएका थिए । उनीहरूमध्ये १२ जना फेब्रुअरी अन्तिम साता नै त्यहाँ पुगिसकेका छन् । अप्रिल २ र ३ मा गरी २० नर्स बेलायत उड्ने ज्ञवालीले बताए । पाइलट कार्यक्रमको रूपमा पहिलो चरणमा नेपालले एकसय नर्स पठाउने योजना बनाएको थियो । 

योग्यता मापदण्डका आधारमा ७१ जनाले अन्तर्वार्ता दिए पनि ४५ जना मात्रै बेलायत जान छनोट भएका थिए । तीमध्ये तीनजना व्यक्तिगत कारणले नजाने भएपछि ४२ जना मात्रै पठाउन लागिएको विभागले जनाएको छ । 

बेलायत पुगेका नर्सहरूले पाँच वर्षसम्म त्यहाँको नेसनल हेल्थ सर्भिस (एनएचएस) अन्तर्गत रहेर सेवा दिनेछन् । यसअघि त्यहाँ पुगेका १२ जनाले मार्चदेखि ह्याम्सहायर हस्पिटल्स् एनएचएस फाउन्डेसन ट्रष्टको नर्सिङ टिममा सामेल भइसकेको एनएचएसले जनाएको छ ।