काठमाडौं । नेपाली कांग्रेसका सांसद बद्री पाण्डेले सहकारी ठगी प्रकरणमा गृहमन्त्री रवि लामिछानेमाथि छानबिन गर्न संसदीय छानबिन समिति गठन गर्नुको विकल्प नरहेको बताएका छन् ।

आइतबार संसद् भवन परिसरमा सञ्चारकर्मीसँग कुरा गर्दै उनले कांग्रेसले संसद्‌मा विषयवस्तु राख्न दिएको कुरालाई पछि हटेको भन्ने नसोच्न सरकारको ध्यानाकर्षण गराए । उनले सरकारबाट संसदीय समिति गठन गर्ने कुनै प्रयास र सहमति नभएको पनि बताए ।

सांसद पाण्डेले कांग्रेसको मागलाई सरकारले बेवास्ता गरे कठोर ढंगले प्रस्तुत हुने चेतावनी दिए । उनले प्रधानमन्त्री पुष्पकमल दाहाल र प्रहरी महानिरीक्षक वसन्तबहादुर कुँवरले गृहमन्त्रीलाई 'क्लिन चिट' दिनुले पनि झनै शंका उब्जिएको बताए ।

"अनुसन्धान गर्नुपर्ने निकायले नै अनुसन्धानको ढोका बन्द गरेपछि अब संसदीय समितिबाट छानबिन गर्नुको विकल्प रहेन । यो पछिल्लो घटनाक्रमले झनै संसदीय समिति गठन गर्नुपर्ने र संसदीय छानबिन समितिबाटै छानबिन हुनपर्ने औचित्य बढेको महसुस भएको छ," उनले भने ।