काठमाडौं । हेल्प नेपाल स्पोर्ट्स र एभरेस्ट भलिबल क्लव आठौँ आरबीबी एनभीए भलिबल च्याम्पियनसिपको च्याम्पियन भएका छन् । त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा शनिबार सम्पन्न च्याम्पियनसिपमा हेल्प नेपाल पुरुषतर्फ र एभरेस्ट महिलातर्फ विजेता बनेका हुन् ।

च्याम्पियन टोली हेल्प नेपाल र एभरेस्ट भलिबल क्लबले समान पाँच लाख रुपैयाँसहित ट्रफी प्राप्त गरे ।

फाइनल खेलमा हेल्प नेपालले त्रिभुवन आर्मी क्लबमाथि ३–२ को संघर्षपूर्ण जित निकाल्दै उपाधि रक्षा गर्‍यो । हेल्प नेपालले आर्मीलाई २०–२५, २७–२५, २३–२५, २९–२७ र २२–२० को रोमाञ्चक सेटमा हरायो । उपविजेता आर्मीले दुई लाख रुपैयाँसहित ट्रफी पायो ।

महिलातर्फ फाइनलमा एभरेस्टले नेपाल पुलिस क्लबलाई ३–१ ले हरायो । पहिलो सेट गुमाए पनि उत्कृष्ट पुनरागमन गर्दै एभरेस्ट पहिलोपटक च्याम्पियन बनेको हो ।

पुलिसले समूह चरणमा एभरेस्टमाथि ३–२ को जित निकालेको थियो । फाइनलमा भने एभरेस्टले बदला लिँदै पहिलो उचाल्यो । फाइनलमा एभरेस्टले पुलिसलाई १९–२५, २५–२२, २५–१८ र २५–१९ ले हरायो । उपविजेता पुलिसले दुई लाख रुपैयाँसहित ट्रफी पायो ।

महिलातर्फ शुक्रबार नै एपीएफ तेस्रो भएको थियो । पुरुषतर्पm शनिबार तेस्रो स्थानका निम्ति भएको खेलमा पुलिसले गण्डकी प्रदेशलाई २५–१६, २५–२० र २९–२७ ले हरायो ।

नेपाल भलिबल संघको आयोजनामा सम्पन्न प्रतियोगिता आठ दिनसम्म चलेको थियो । न्युज एजेन्सी नेपाल