काठमाडौं । भारतको दिल्लीका मुख्यमन्त्री एवं आम आदमी पार्टी (आप)का अध्यक्ष अरविन्द केजरीवालले प्रवर्तन निर्देशनालय (ईडी)विरुद्ध सर्वोच्च अदालतमा जमानतका लागि पेस गरेको निवेदन फिर्ता लिएका छन् ।
केजरीवाललाई बिहीबार राति उनकै निवासबाट पक्राउ गरिएको थियो । बिहीबार राति नै आम आदमी पार्टी सर्वोच्च अदालतमा पुगेको थियो । ईडीले केजरीवाललाई पक्राउ गरेको विषयमा राति नै सुनुवाइ होस् भन्ने माग पार्टीको थियो । केजरीवालका वकिल अभिषेक मनु सिंघवीले सर्वोच्चमा दिएको निवेदन फिर्ता लिने निर्णय गरेको बताएका हुन् ।
तल्लो अदालतको सुनुवाइपछि मात्रै सर्वोच्चमा जानका लागि आपले उक्त निवेदन फिर्ता ल्याएको बताइएको छ । यसअघि सर्वोच्च अदालतले तल्लो अदालतलाई बाइपास गर्न नसकिने भन्दै तेलंगानाको भारत राष्ट्र समिति (बीआरएस) पार्टीका नेतृ के. कविताको जमानतको निवेदन खारेज गरेको थियो ।
त्यसै कारण केजरीवालको टिमले पनि निवेदन फिर्ता लिएको ठानिएको छ । पक्राउ परेपछि पहिलो प्रतिक्रियामा केजरीवालले “भित्र वा बाहिर जहाँ भए पनि आफ्नो जिवन देशप्रति समर्पित” भएको भनेका छन् ।
दिल्ली राउज एभिन्यू अदालतले केजरीवाललाई १० दिन हिरासतमा राख्न माग गर्दै ईडीले पेस गरेको निवेदनमा शुक्रबार नै आदेश दिने तयारी छ ।
