विराटनगर । भोजपुरको हतुवागढी–७ पिप्लेमा आगलागीबाट ज्यान गुमाएका बालबालिकाको परिवारलाई कोसी प्रदेश सरकारले नगद राहत दिएको छ । मंगलबार कोसी प्रदेशका मुख्यमन्त्री केदार कार्कीले घटनास्थलमै पुगेर पीडितलाई समवेदना दिँदै ज्यान गुमाएका बालबालिकाका दुई परिवारलाई राहत रकम हस्तान्तरण गरेका हुन् ।

आन्तरिक मामिला तथा कानुन मन्त्रालयबाट एक लाखका दरले राहत वितरण गरिएको मुख्यमन्त्री कार्कीको निजी सचिवालयले जनाएको छ । 

मुख्यमन्त्री कार्कीले प्रदेश सरकारले दुःखको समयमा सरकारले मलमपट्टी लगाएको उल्लेख गर्दै भने, “प्रदेश तथा स्थानीय सरकार घर आगनकै सरकार भएकाले जनताको समस्यामा तथा पीडामा सधैँ साथ रहन्छ । दुःखमा सरकार सँगै छ ।” 

गएको शनिबार आगलागी हुँदा स्थानीय रमेश कार्कीकी पाँच वर्षीया छोरी दिप्सिका कार्की, तीन वर्षीय छोरा दिउनिष कार्की र केदार कार्कीका चार वर्षीय छोरा प्रनिश कार्कीको ज्यान गएको थियो ।

मुख्यमन्त्री कार्कीले यो समय हावाहुरीका साथै आगलागी बढी हुने भएकाले पनि सजग रहन अपिल गरेका छन् ।