![पैसा नडुब्ने गरी आर्थिक वृद्धि हुने क्षेत्रमा लगानी गर्नुस् : अर्थमन्त्री पुन](https://12khari.top/uploads/posts/barsaman-pun6-1710652082.jpg)
काठमाडौं । अर्थमन्त्री वर्षमान पुनले पैसा नडुब्ने गरी ठूलो आर्थिक वृद्धि हुने क्षेत्रमा लगानी गर्न नागरिक लगानी कोषलाई निर्देशन दिएका छन् । आइतबार नागरिक लगानी कोषको ३४औँ वार्षिकोत्सव कार्यक्रममा उनले यस्तो निर्देशन दिएका हुन् ।
उनले लगानी कोषले दीर्घकालीन महत्त्वका पूर्वाधार निर्माण, रोजगारी सिर्जना गर्ने क्षेत्रमा लगानी गर्नुपर्नेमा जोड दिए । विगतमा ठूला ऋण लगानी गर्दा भएका कमी–कमजोरीलाई भविष्यमा नदोहोर्याउने प्रतिबद्धतासहित अघि बढ्न उनले सुझाव दिए ।
उनले देशमा विद्यमान समस्याको समाधान गरेर अघि बढ्नुपर्ने चुनौती रहेको बताए । आफ्नो संस्था, समाज, देशको समस्या आफैँले समाधान गर्नुपर्ने उनले उल्लेख गरे ।
उनले राजनीतिमा शुद्धीकरण जरुरी रहेको पनि बताए । प्रशासन संयन्त्रमा पनि शुद्धीकरण जरुरी रहेको उनले औँल्याए । प्रशासन संयन्त्रको शुद्धीकरणबिना देशको आवश्यकता पूरा गर्न नसकिने उनले उल्लेख गरे ।
“राजनीतिक नेतृत्वका समस्या छन्, राजनीतिमा शुद्धीकरण जरुरी छ, हामी आफैँले ठानेका छौँ । आमजनसमुदायले ठानेको छ,” उनले भने, “हाम्रो प्रशासन संयन्त्रमा शुद्धीकरण जरुरी छ । आजको आवश्यकता पूरा गर्न सक्ने अवस्था छैन । हिजोको हामी सम्मान गर्दछौँ, कैयौँ कमी भए, त्यसलाई सच्याएर जानुपर्छ ।” न्युज एजेन्सी नेपाल