काठमाडौं । प्रमुख प्रतिपक्ष दल नेपाली कांग्रेसले राष्ट्रियसभा अध्यक्ष निर्वाचनको मिति सार्नुपर्ने प्रस्ताव गरेको छ ।

आइतबार बसेको राष्ट्रियसभा कार्यव्यवस्था परामर्श समितिको बैठकमा कांग्रेस संसदीय दलका नेता कृष्णप्रसाद सिटौलाले निर्वाचनको मिति परिवर्तन गर्नुपर्ने प्रस्ताव गरे । उनले बिदा भएर गएका सांसद र राष्ट्रियसभा अध्यक्ष मिलेर बनाइएको ‘क्यालेन्डर’अनुसार निर्वाचनको मिति तय हुन नहुनेमा जोड दिए ।

“कांग्रेसका साथिहरूले निर्वाचन सार्ने प्रस्ताव गर्नुभएको हो । सर्वसहमतिले बनाएको निर्णय भएकाले मिति परिवर्तन नगरौँ भन्ने निर्णयमा पुग्यौँ,” राष्ट्रियसभामा नेकपा (एमाले) संसदीय दलका नेता देवेन्द्र दाहालले बाह्रखरीसँग भने ।

दाहालका अनुसार, तोकिएकै मितिमा अध्यक्षको निर्वाचन गर्ने गरी आजको प्रतिनिधिसभा बैठकबाट निर्णय गरिनेछ । अर्थात्, यही फागुन २९ गते राष्ट्रियसभा अध्यक्षको निर्वाचन हुनेछ ।

कांग्रेसबाट प्रतिनिधित्व गरेका राष्ट्रियसभा सांसद आनन्द ढुंगानाले पनि निर्वाचनको मिति परिवर्तन गर्नुपर्ने आफूहरूले माग गरेको बताए । “कार्यतालिका पहिले बनाएको छ, नयाँ मान्छे भर्खर आएका छौँ । हाम्रो भनाइ कार्यतालिका अहिले बनाउनुपर्छ,” उनले भने, “कार्यव्यवस्थाले तय गरेपछि मान्नु नै पर्छ ।”

समयाभावका कारण मत माग्न नपाउने परिस्थिति बनाउन खोजिएको उनले जिकिर गरे । “२१ गते आयौँ, २४ गते सदन चल्यो । आज सदन चल्दै छ । अनि, आजै यो दिन चुनाव यो दिन हुन्छ भनेपछि तयारी गर्ने हामीले समय पाएनौँ नि,” उनले थपे ।

राष्ट्रियसभा अध्यक्ष पदको निर्वाचनको दिन तोक्ने र आउँदो आर्थिक वर्ष २०८१/०८२ का निम्ति विनियोजन विधेयकका सिद्धान्त र प्राथमिकतामाथि सभामा छलफल गर्ने समितिको बैठकबाट निर्णय गरिएको छ ।