काठमाडौं । सात दशक अगाडि देशका विशिष्ट मूर्धन्य साहित्यकारहरूको उपस्थितिमा इतिहास रचेको पूर्वी नेपालको रमणीय मैदानमा आउँदो साता नेपाली लोक–रक भाकाको संगीत गुञ्जिने भएको छ । नेपालको चर्चित साँगीतिक ब्यान्ड नेपथ्यले आउँदो चैत ३ गते इलाम, सूर्योदय नगरपालिका अन्तर्गतको करफोकस्थित सल्लाघारीको पाखामा साँगीतिक प्रस्तुतिदिने भएको छ । लाप्चा भाषामा ढुकुरलाई करफोक भनिन्छ ।

नेपालयद्वारा प्रेषित प्रेस विज्ञप्तिअनुसार जतिखेर नेपालमा काठमाडौं उपत्यकाबाहिर विरलै बृहत् साहित्यिक कार्यक्रम हुन्थ्यो । त्यसबेला अर्थात् २००९ सालमा कविशिरोमणि लेखनाथ पौड्याल, महाकवि लक्ष्मीप्रसाद देवकोटा, नाटककार बालकृष्ण सम, महानन्द सापकोटा, धरणीधर कोइराला, सूर्यविक्रम ज्ञवाली र शंकर लामिछाने लगायतका साहित्यकारहरू भेला भएर करफोकमा ‘पहिलो अन्तर्राष्ट्रिय नेपाली साहित्य सम्मेलन’ आयोजना भएको इतिहास छ । नेपथ्यले प्रस्तुत गर्न लागेको त्यो पाखो उक्त भेगकै ऐतिहासिक महत्त्व राख्ने करफोक विद्यामन्दिरको परिसर रहेको विज्ञप्तिमा जनाइएको छ । 

आयामेली लेखक इन्द्रबहादुर राई, कला समीक्षक तथा पत्रकार नारायणबहादुर सिंहजस्ता हस्ती व्यक्तित्व प्रधानाध्यापक अनि साहित्यकार तारानाथ शर्मा शिक्षक रहेको यो विद्यालयको शिलान्यास २०१० सालमा तत्कालीन युवराज महेन्द्रले गरेको विज्ञप्तिमा जनाइएको छ । नेपथ्यका गायक एवं अगुवा अमृत गुरुङ भन्छन्, “यसपटक इलामका साथीहरूले जोग मिलाइदिनुभएकोमा असाध्यै खुसी लागेको छ ।”

मेची राजमार्गसँगै जोडिएको यो विद्यालय फिक्कल भएर इलामबजारतर्फ जाँदा बाटैमा अर्थात् सूर्योदय नगरपालिकाअन्तर्गत पर्छ । कुनै समय दुई वर्षसम्म जिल्लाको सदरमुकाम (खलंगा) रहेको यो स्थान वि.स. १८७५ सालमा नामसालिङ हुँदै हालको सदरमुकाम अर्थात इलाम बजारमा सरेको हो ।

नेपथ्यले मुलुकका स–साना गाउँबस्ती हुँदै विश्वका ठूला सहरहरूसम्म आफूलाई प्रस्तुत गर्दै आएको छ । नेपालमा हालसम्म करिब १२० वटा कन्सर्ट आयोजना गरिसकेको ब्यान्डले नेपालबाहिर विश्वका १७ वटा मुलुकको ४१ वटा मुख्य सहरमा ८० भन्दा बढी साँगीतिक प्रस्तुति दिइसकेको छ । 

यो कन्सर्टको आयोजना ‘इलाम गुरुङ समाज’ले गर्न लागेको हो । करफोक कन्सर्टमा टिकटको मूल्य एक हजार एक सय रुपैयाँ राखिएको छ ।

कन्सर्टका हकमा विदेशका ठूला सहरहरूमा आयोजना हुने गुणस्तरलाई नेपालका साना गाउँबस्तीसम्म पनि एकरूपता दिन आफूहरू सदैव क्रियाशील रहेको र करफोकमा पनि दर्शकले यसलाई महसुस गर्नसक्ने जानकारी नेपथ्यलाई व्यवस्थापन गर्दै आएको नेपालयका अर्पण शर्माले बताएका छन् ।

“पूर्वाञ्चलका विभिन्न सहरहरूमा टिकटको खुला बिक्रीवितरण सुरु भइसकेको छ,” शर्माले भनेका छन्, “त्यसबाहेक नेपथ्यकै वेबसाइट www.nepathya.com.np मार्फत् अनलाइनबाटै पनि टिकट किन्न सकिने प्रबन्ध मिलाइएको छ ।”

कन्सर्टमा मुख्य गायक अमृतलाई ड्रमसेटमा ध्रुव लामा, बेस गीतारमा सुविन शाक्य, गीतारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाउने प्रेस विज्ञप्तिमा जनाइएको छ ।