काठमाडौं । नेपालको ट्रेड (होलसेल तथा रिटेल–थोक तथा खुद्रा) क्षेत्रमा काम गर्नेको औसत मासिक तलब १७ हजार रहेको छ । राष्ट्रिय तथ्यांक कार्यालयका अनुसार व्यापार क्षेत्रमा काम गर्नेको मासिक तलब औसतमा १७ हजार ३७४ रहेको छ ।

तथ्यांक कार्यालयको ‘नेपाल वितरण व्यापार सर्वेक्षण, २०२२’ अनुसार सबैभन्दा बढी तलब वाग्मती प्रदेशमा छ । वाग्मती प्रदेशमा व्यापार क्षेत्रमा काम गर्नेको ज्याला तथा तलब मासिक औसतमा १८ हजार २०३ रुपैयाँ छ ।

दोस्रोमा कोसी प्रदेशमा १७ हजार २८५ र तेस्रोमा गण्डकी १६ हजार ७८८ रुपैयाँ रहेको छ । चौथोमा सुदूरपश्चिममा मासिक तलब १६ हजार ५४०, लुम्बिनीमा १६ हजार ३५८ र कर्णालीमा १६ हजार ९१ रुपैयाँ छ ।

वितरण व्यापार क्षेत्रमा सबैभन्दा कम मासिक औसत तलब तथा ज्याला मधेस प्रदेशमा १५ हजार ३३९ रुपैयाँ हुने गरेको छ ।

सन् २००८ मा गरेको पहिलो वितरण व्यापार सर्वेक्षणको १४ वर्षपछि कार्यालयले दोस्रो सर्वेक्षण गरेको हो । आर्थिक वर्ष २०७९/०८० को तथ्यांकअनुसार वितरण व्यापार क्षेत्रले कुल गार्हास्थ उत्पादन (जीडीपी)मा १५.३९ प्रतिशत योगदान गर्छ ।

जीडीपीमा दोस्रो ठूलो योगदान गर्ने क्षेत्र भए पनि यहाँ काम गर्नेको तलब तथा ज्यालादारी भने न्यून देखिन्छ ।