विराटनगर । कोसीका मुख्यमन्त्री केदार कार्कीले कानुनले सर्वसाधारणलाई बाटो देखाउनुपर्नेमा अहिलेसम्म डरमात्रै देखाउँदै आएको भन्दै असन्तुष्टि जनाएका छन् ।

मुख्य न्यायाधिवक्ताको कार्यालय कोसी प्रदेशको छैटौँ स्थापना दिवसको अवसरमा आयोजित कार्यक्रममा मुख्यमन्त्री कार्कीले कानुनले सर्वधरणलाई डर, त्रास देखाउनुभन्दा पनि सहजीकरण गर्नुपर्ने बताएका हुन् ।

“कानुन अपरिवर्तनीय होइन, समय आवश्यकताअनुसार परिवर्तन हुन्छ,” उनले भने, कानुन शासनभन्दा सहजीकरणका लागि हुनुपर्छ,” उनले भने, “प्रदेशमा अहिलेसम्ममा ६ जना मुख्य न्यायाधिवक्ता उत्पादन भइसक्यो । तर, आफू पदमा हुँदा त्यही कानुन ठिक र पदबाट हटेपछि त्यही कानुन गलत भएको भन्दै अदालतमा बहस गरिन्छ । यसरी कसरी संघीयता कार्यान्वयन हुन्छ ?”

उनले आफू सरकारमा रहेसम्म संविधानको अक्षरशः पालना गर्ने प्रतिबद्धता जनाए । सहिदको रगतले लेखिएको संविधानविपरीत सरकारको कुनै पनि काम नगर्ने उनले सुनाए । उनले अहिलेको सरकारले सुशासन र जनताको सेवामा कुनै सम्झौता नगर्ने प्रतिबद्धता जनाए ।