काठमाडौं । जनमत पार्टीका अध्यक्ष चन्द्रकान्त (सीके) राउतले वर्तमान सत्ता गठबन्धन अन्तर्राष्ट्रिय शक्ति केन्द्रको प्रभावमा बनेको टिप्पणी गरेका छन् । राउतले 'बेल्ट एन्ड रोड इनिसियटिभ' (बीआरआई) विस्तारको स्वार्थसँग जोड्दै वर्तमान सत्ता गठबन्धनको मूल चीनसँग जोडिएको दाबी गरे ।

उनले अन्तर्राष्ट्रिय शक्ति केन्द्रको प्रभावसँगै नेपालमा वैचारिक ध्रुवीकरणको पनि सुरुवात भएको बताए ।

“नेपालमा वैचारिक ध्रुवीकरणको सुरुवात भएको छ । शक्ति केन्द्रसँग पनि जोडिएको छ । बीआरआईसँगको स्वार्थ जोडिएर गठबन्धन निर्माण भएको रहेछ,” अध्यक्ष राउतले बाह्रखरीसँग भने, “मूलरूपमा वर्तमान गठबन्धन सत्तासँग मात्र नजोडिएर वैचारिकरूपमा नै निर्माण भएको छ ।”

उनले अन्तर्राष्ट्रिय शक्ति केन्द्रको स्वार्थबाट बनेको गठबन्धनले शक्ति केन्द्रहरूलाई नेपालको राजनीतिमा आमन्त्रण गरेको पनि टिप्पणी गरे ।

“नेपालको सत्ता र गठबन्धन अन्तर्राष्ट्रिय शक्ति केन्द्रसा जोडिन पुग्यो,” राउतले भने, “यसले डेमोक्र्याटहरूलाई ध्रुवीकरणमा जान प्रोत्साहन गर्नेछ । किनभने कम्युनिस्ट र बीआरआईका पक्षहरू एक ठाउँमा उभिइसकेका छन् ।”

उनले नयाँ समीकरणका लागि मार्ग प्रशस्त भए पनि तत्कालै सरकार निर्माणको आधार भने नदेखिएको बताए । त्यसैले प्रतिपक्षमै समीकरण निर्माण हुने र त्यसको विस्तार हुँदै जाने प्रक्षेपण गरे ।

“नयाँ लोकतान्त्रिक गठबन्धन निर्माणको बाटो खुला भए पनि सत्ता र शक्ति केन्द्रको संयुक्त स्वार्थमा संख्या घटिरहेको छ । त्यसैले तत्कालका लागि सरका निर्माण गर्ने सम्भावना कमजोर भएको छ,” उनले भने, “तर, सरकार गठनको मात्र कुरा नभएकाले भोलिका दिनमा पनि लोकतान्त्रिक शक्तिहरूबीचको सहकार्य विस्तारित हुँदै जानेछ ।”