काठमाडौं । नइ प्रकाशनले चार वर्षदेखि १५ वर्षसम्मका आठ बालबालिकालाई २०७९ सालको ‘नइ देरुनीखपू बाल पुरस्कार’ प्रदान गर्ने भएको छ ।
नइ प्रकाशनका सदस्यसचिव नरेन्द्रराज प्रसाईद्वारा प्रेषित विज्ञप्तिअनुसार ‘नइ देरुनीखपू बाल पुरस्कार’बाट पुरस्कृत हुनेहरूमा बहुआयामिकतर्फ आयुषा लम्साल, साहित्यतर्फ कुञ्जल शुभेच्छु लुइँटेल, चित्रकलातर्फ रेजिना बोहोरा, संगीततर्फ ईशा प्रजापति, नृत्यतर्फ कृष्मा ढुंगाना, खेलकुदतर्फ आहाना कार्की रहेका छन् ।
यस पुरस्कारका साथ जनही नगद राशि १० हजार रूपैयाँ प्रदान गरिने जनाइएको छ ।
त्यस्तै, नृत्य विधामा ‘नइ कोपिला पुरस्कार’ ऋषिका घिमिरेलाई र ‘नइ चिचिला पुरस्कार’ श्रेस्मी दाहाललाई प्रदान गर्ने भएको छ । पुरस्कारका साथ नगद राशि सात हजार र पाँच हजार रूपैयाँ प्रदान गरिने विज्ञप्तिमा जनाइएको छ ।