काठमाडौं । त्रिदेशीय ट्वान्टी–२० शृंखलाको फाइनलमा घरेलु टोली नेपालले नेदरल्यान्ड्ससामु १८५ रनको लक्ष्य प्रस्तुत गरेको छ । 

मंगलबार कीर्तिपुरस्थित त्रिवि क्रिकेट मैदानमा जारी खेलमा टस जितेर ब्याटिङमा आएको नेपालले निर्धारित २० ओभरमा आठ विकेट गुमाएर १८४ रनको योगफल खडा गर्‍यो । 

नेपालबाट ओपनर आसिफ सेखले सर्वाधिक ४७ रन बनाए । खेलको सुरुआतमै आसिफले जीवनदान पाएका थिए । नेदरल्यान्ड्सका भिभियन किंग्माले गरेको बल २.१ ओभरमा दुई रनमा खेलिरहेका आसिफको क्याच माइकल लेभिटले मिस गरेका थिए । 

२३–१ को अवस्थाबाट आसिफले कप्तान रोहितसँग ३५ बलमा ५९ रनको साझेदारी गर्दै नेपालको इनिङ उकासेका थिए । ९.२ ओभरमा आउट हुनुअघि रोहितले १९ बलमा तीन चौका र एक छक्कासहित २५ रन बनाए ।

यसपछि ८२–२ को अवस्थाबाट आसिफले तेस्रो विकेटका लागि गुल्सन झासँग ४३ रनको साझेदारी गर्दै नेपाललाई अघि बढाएका थिए । अर्धशतक बनाउन तीन रनले चुकेका आसिफले ३७ बलमा एक चौका र तीन छक्का प्रहार गरे । गुल्सनले टिमको खातामा ३४ रन बनाए । १८.१ ओभरका फ्रेड क्लासेनबाट आउट हुनुअघि गुल्सनले ३५ बलमा तीन छक्का प्रहार गरे ।

खेलको १७औँ ओभर समाप्त हुँदा नेपाल १५८–४ को स्थितीमा थियो । तर, यसपछि १८औँ र १९औँ ओभरमा दुई–दुई विकेट गुमाएपछि घरेलु टिमविरुद्ध नेदरल्यान्ड्सले दबाब बनाएको थियो ।

नेदरल्यानन्ड्सका माइकल लेभिट, साइब्रान्ड एन्गलब्रेट, फ्रेड क्लासेन र टिम भान डेर गुग्टेनले समान दुई विकेट लिए ।ट्वान्टी–२० विश्वकपको तयारीका लागि आयोजित शृंखलामा नेपाल, नेदरल्यान्ड्स र नामिबियाले सहभागिता जनाएका थिए ।