काठमाडौं । धादिङमा डिउटीमा खटिएका प्रहरी हवल्दारलाई ठक्कर दिएर मोटरसाइकल दुर्घटना भएको छ । सोमबार राति करिब ११ बजेर २० मिनेटमा नीलकण्ठ नगरपालिका–३, बीचबजारमा सो दुर्घटना भएको हो ।

नीलकण्ठ–४, रायटारबाट आउँदै गरेको बा७८प ५५३ नम्बरको मोटरसाइकलले बीचबजार डिउटीमा खटिएका हवल्दार रामप्रसाद थपलियालाई ठक्कर दिएको थियो । धादिङकै रुवी भ्याली गाउँपालिका–१, लवाङका ३३ वर्षीय आवाज तामाङले चलाएको मोटरसाइकलले हवल्दारलाई ठक्कर दिएको प्रहरीले जनाएको छ ।

तामाङले अत्यधिक मादकपदार्थ सेवन गरी मोटरसाइकल चलाएको वाग्मती प्रदेश प्रहरी कार्यालयले जानकारी गराएको छ ।

मोटरसाइकलको ठक्करबाट प्रहरी हवल्दारको दाहिने खुट्टामा चोट लागेको थियो । मोटरसाइकल चालकका पनि दुवै हातखुट्टामा सामान्य चोट लागेको थियो । अस्पतालमा उपचारपश्चात् उनीहरू दुवैजना ‘डिस्चार्ज’ भइसकेका प्रहरीले जनाएको छ । मोटरसाइकल र चालक जिल्ला प्रहरी कार्यालय धादिङको नियन्त्रणमा छन् ।