काठमाडौं । पूर्वप्रधानमन्त्री तथा नेकपा (एकीकृत समाजवादी)का अध्यक्ष माधवकुमार नेपालले प्रधानमन्त्री पुष्पकमल दाहाल ‘प्रचण्ड’लाई काम गर्ने तरिकामा भएको त्रुटीको समीक्षा गर्न सुझाएका छन् । 

भरतपुर भ्रमण वर्ष २०२४ को उद्घाटन कार्यक्रममा उनले प्रधानमन्त्रीले विज्ञ, उद्यमीलगायत विभिन्न क्षेत्रका व्यक्तिलाई बोलाएर छलफल गर्ने गरे पनि सोहीअनुसार परिणाम आउन नसकेको बताए । “...यसका बाबजुद पनि परिणाम हामीले पाउन सकेका छैनौँ । परिणाम कसरी प्राप्त गर्न सकिन्छ । हाम्रा योजनामा कहाँ त्रुटी रहेका छन् । हाम्रा कामका तरिकामा कहाँ त्रुटी रहेका छन् । यी सबैको पनि समीक्षा गर्नुपर्ने आवश्यकता छ,” नेपालले भने । 

उनले जनताका सल्लाह र आलोचनाले सही बाटोमा अघि बढ्न प्रेरित गर्ने बताए । उनले महानगरकी मेयर रेनु दाहालप्रति जनताको प्रंशसा सुुनेको बताए । आफूले सोध्दा महानगरपालिबासीले सडक निर्माणमा प्रशंसा गरेको बताए ।

उनले त्रुटीको पक्षमा विचार गर्दै अझै सुन्दर बनाउन सुझाए । भूमिहीन किसान, सुकुम्बासीको समस्या समाधानका लागि ध्यान दिन आग्रह गरे । गुणस्तरीय शिक्षा, स्वास्थ्य लगायतका विषयमा तीनै तहका सरकारले समन्वय गरेर काम गर्नुपर्ने भनाइ उनको छ ।